Бай-Тайганың Бай-Тал суурга 1986 чылда туттунган Н.С. Конгар аттыг ортумак школага бо чылын капиталдыг септелгени чоруткан. Школага капитал септелге ажылдарын «Депшилге» КХН-ниң шевер тудугжуларының, штукатур-маляржыларының, монтаж-эптекчилериниң ачызында бүгү септелге ажылдары август 17-ден ноябрь 20-ге чедир доозулган.
Школаның 48 ажылчынынга, 47 башкызынга, 281 өөреникчизинге ол канчаар-даа аажок улуг белек болган. Олар тудугжуларга улуу-биле өөрүп четтиргенин илередип турарлар.
420 школачы өөренир 3 каът школаның ишти-дашты долузу-биле чаарттынган. Школаның эжиктерин, соңгаларын шынарлыг, көрүштүг кылдыр кылган. Арыгланыр өрээлдерде раковиналар, унитазтарны салган. Школаның өртке удур сигнализациязын салган, эргижирээн электри удазыннарын солаан.
Септелге үезинде ажылчыннарга чунар-бажыңны туткан. Оларны хүнде 4 катап изиг чем-биле хандырып турган.
Бо капиталдыг тудуг ажылынга септекчилер, тудугжулар, электриктер, школа ажылчыннары, поварлар дээш дыка хөй чон киришкенин демдеглевес арга чок.
Бай-Тал суурнуң төвүнде көрүштүг 3 каът школа турар. Өөреникчилер болгаш башкылар школазынче өөрүшкү-маңнайлыг өөренип кирипкен.
/ Бараат ДЕЛЕГ-ООЛ,
күш-ажылдың хоочуну, Бай-Тайга кожууннуң алдарлыг башкызы.
Бай-Тал суур.
Чырык, чылыг, көрүштүг-даа
16 декабря 2022
35