Дөрт муӊ ажыг чаш пөштү тарып олурткан

«Арга-эзимнерни кадагалап арттырар бис» деп Бүгү-российжи акцияны Тыва Республикада чылдыӊ-на күзүн болгаш чазын эрттирип турар.

Ооӊ кол сорулгазы — арга-эзимге ыяш дөстерин тарып олуртур ажылды доктаамал чорудуп, арга-арыгныӊ девискээрин улгаттырып, ук акцияже хөй улусту эвилелдээри.

Бо күзүн акцияны Кызылдыӊ арга-арыг ажыл-агыйыныӊ девискээринге эрттирген. Ук акцияга республиканыӊ Арга-арыг ажыл-агыйыныӊ болгаш бойдус ажыглалыныӊ яамызы, Авиа арга-арыг камгалалыныӊ ажылдакчылары болгаш суд приставтары киржип чедип келген.

Ээрбектиӊ арга-арыг участогунуӊ Сайыр-Аксы деп черде эрги төжектерни тура тырткаш, таарыштыр аштап-арыглап, хөрзүнүн баш бурунгаар белеткеп каан турган. Акцияныӊ киржикчилери ол участоктуӊ 2 гектар шөлүнге дөрт муӊ ажыг пөштү тарып олурткан. Сибирь пөжүнүӊ 2 чыл өстүрген чаш дөстерин Красноярскыныӊ үнүштер өстүрер черинден (питомник) эккелген.

Келир үеде онза чараш чурумалдыг арга-эзим болуп өзүп үнүп келир өзүмнерни тарып олуртур экология акциязыныӊ шупту киржикчилери шудургу ажылдаан дээрзин ТР-ниӊ Арга-арыг ажыл-агыйыныӊ болгаш бойдус ажыглалыныӊ яамызы дыӊнадып турар.

Арга-арыг ажыл-агыйының яамызының медээзинден Р.Демчик белеткээн.