Тываның девискээринге агаар-бойдустуң байдалы бо чайын кааңдаашкынныг болган уржуунда август айның эгезинде арга-арыглыг болгаш хову черлерге өрттер хып үнүп болурунуң айыылы дүшкүүрлүг болуп артпышаан. Эрткен чайның кончуг изиг хүннеринде республиканың арга-арыглыг девискээринге болгаш ховуларга 111 өрт хып үнген. Оларның чамдыызынга арга-арыгларга болгаш ховуларга чорааш, өртке удур онза байдалдыг чурумнуң негелделерин сагываан хамаатылар буруулуг болган.
Июль 29-туң хүнүнде байдал-биле алырга, республиканың Каа-Хем, Тожу, Чеди-Хөл, Кызыл кожууннарның арга-арыглыг девискээринге сес өрт хып турган. Оларны өжүреринге агаар-бойдустуң хадыычал байдалы шаптык болган. Өрттерни өжүреринге 75 өртчүнү, арга-арыгны өрттерден агаардан камгалаар албанның 57 ажылдакчызын, 13 санныг тускай техниканы хаара туткан.
Арга-арыглар өрттери немей хып үнүп кээр, хып турар өрттерни өжүреринге немелде күш херек апаар таварылгаларда дузалаштырып киирери-биле 166 өртчүнү, 111 санныг тускай техника аймаан курлавырда тудуп турар.
Арга-арыг өрттериниң айыылдыг байдалын сайгарып көргеш, Тываның девискээринге өрт айыылынга удур онза байдалдыг ёзу-чурумнуң хуусаазын август айның 19-ке чедир узадыр шиитпирни республиканың чазаа хүлээп алган. Өрт айыылынга удур онза байдалдыг ёзу-чурумнуң негелделерин хажыткан, өрттер хып үнеринге буруулуг болган кижилерни илередип тыварын күштелдирерин Тываның Баштыңы Владислав Ховалыг арга-арыг яамызының ажылдакчыларындан, кожууннарның болгаш сумуларның удуртукчуларындан негээн.
Чайның агаар-бойдузунуң изиинден серииттенири-биле хөй кижилер Тываның хемнеринге болгаш хөлдеринге кирип эштип турар. Сугга оваарымча чок болганының уржуунда май– июль айларның хүннеринде 18 кижи сугга дүжүп, амы-тынындан чарылган. Оларның 15-жи улуг кижилер, 3-жү бичии уруглар. 10 улуг кижи эзирик эштип тургаш, сугга дүжүп өлген.
ОБЯ-ның сугга камгалал албанының ажылдакчылары хемнерге болгаш хөлдерге хайгаарал-камгалал ажылдарын доктаамал чорудуп турда-ла, сугга кижилер амы-тынындан чарлыр таварылгалар болгулаан.
Онза байдалдар яамызының медээлеринден.
"Шын" №57 2024 чылдың июль 31
