Республиканың туберкулезка удур демисел чорудар диспансери ук онзагай хүнге тураскаадып, хөй-ниитиге бо кара сагыштыг аарыгның дугайында база катап сагындырып, оон камгаланыр байгы-ла хемчеглерни алырынче кыйгырары-биле, Кызыл хоорайның Арбат шөлүнге "Ак ромашка" деп акцияны эрттирер.
11 шактан эгелеп, ук шөлге туберкулезка удур демисел чорудуп турар эмчилер, өске-даа эмнелге ажылдакчылары чон-биле ужуражып, арга-сүмезин кадар, айтырыгларга харыылап бээр.
Күзелдиг улус ол-ла шөлге көжүп чоруур ФГ-херекселинге хөрээн тырттырып ап, харыызын дораан холунга ап алыр аргалыг болур.
Эң-не идепкейлиг киржикчилерге эмчилер боттарының талазындан белек-селекти, бичии шаңналдарны тыпсыр.
"Чылдың-на шак мындыг хемчеглерни калбаа-биле эрттирип турган улус бис. - деп диспансерниң улуг эмчизи Рустам Чудаан-оол медегледи. - Ынчалза-даа сөөлгү чылдарда хөй чон чыыры нарын апарганының салдары-биле, арыг агаарга мындыг хемчеглер-биле кызыгаарлаттынар апарганывыс бо. Чонувуска хөрээн доктаамал хынадып ап турзун деп дагын база сагындырбышаан, эртен Арбат шөлүнге кээп, акцияга киржиринче чаладывыс".