Библиотекарь кижиниң мергежили делегейде эң-не чугула болгаш ажыктыг. Чүге дизе ном саңының ажылдакчызы угаан-медерелдиң күчү-күжүн мөөңнеп чыып каан номнар делегейинче номчукчуларны углап-баштаарынга дузалыг. Ханы эртем-билиглиг, эвилең-ээлдек, кижизиг, кичээнгейлиг чорук библиотекарь кижиниң аажы-чаңындан билдинип кээр.
Бодунуң шилип алган мергежилинге хөй чылдарда ханы бердинген кижилерниң бирээзи Руслана Тарначы. Ол 1963 чылда Эрзин кожууннуң Мөрен суурга төрүттүнгеш, өскен. 1982 чылда Кызылдың уран чүүл училищезинин библиотека салбырын хып дээн 19 харлыында дооскаш, 1985–1998 чылдарда өскен-төрээн сууру Мөренниң ном саңының эргелекчизи болуп баштайгы күш-ажылчын базымнарын эгелээн.
1998–2011 чылдарда Эрзин кожууннуң төпчүткен библиотека системазының методизи болуп, үре-түңнелдиг, эки ажылдаан. Методист дээрге ном саңының кол ажыл-чорудулгазының өзээ болур. Руслана Сояновна ажылдап турган үезинде улуг харыысалгалыг, бедик негелделиг, чогаадыкчы үзел-бодалдыг база ажылдакчыларының профессионал билиинче улуг кичээнгейни салып чораан.
2012–2019 чылдарда Эрзинниң төпчүткен библиотека системазының директору дужаалга томуйлаткан. Директор эрге-дужаалга ажылдаан үезинде кожууннуң көдээ ном саңнарының материалдыг, техниктиг баазазын амгы үениң негелдезинге дүүштүр экижидери-биле эвээш эвес үлүг-хуузун киирип, шаңнал-макталдыг ажылдап келген.
Амгы үеде бистиң аравыста ам-даа ажылдап, шынныг, чаагай, буянныг чырыктың дөзү — номнар-биле ажылга 41 чыл өскерлиш чок бараан болуп чоруур хүндүлүг башкывыс.
Бо чылын Руслана Сояновнага юбилейлиг чыл болуп турар. Хоочун дагдыныкчывыска ам-даа хөй чылдарда бистиң аравыска арга-сүмезин берип, кадык-чаагай, кезээде өөрүшкү-маңнайлыг, аас-кежиктиг чурттаарын күзедивис!
Алдын-кыс ЛОПСАН,
Эрзин кожууннуң В.Л. Эренчин аттыг төпчүткен ном саңының библиотекары.
"Шын" №38 2023 чылдың май 27