2022 чылдың апрель 18-те Тываның төлептиг оолдарының бирээзи, Приморье крайның 30943 дугаар шериг кезээниң танкыларга удур машина батареязының командири, сержант Мерген-Херел Борисович Симчитмаа-биле байырлашкан. Ынчан ол чүгле 25 борбак харлыг турган.
Мерген-Херел Симчитмаа 1996 чылдың ноябрь 18-те Екатерина Сарыг-ооловна биле Борис Дадаровичиниң хөй ажы-төлдүг өг-бүлезинге хеймер оглу болуп төрүттүнген. Ооң чоок кижилериниң чугаазы-биле алырга, Мерген-Херел үргүлчү топтуг-томаанныг, кандыг-даа ажыл-ишке харыысалгалыг чораан. Ынчангаш ооң дайзыннары-даа чок, а харын-даа аңаа шупту улус ынак, хүндүлээр турган.
2003 чылда Тес-Хем кожууннуң Кызыл-Чыраа школазынга 1-ги классче өөренип кирген. Мерген-Херел Борисович дузааргак, кызымак, өөредилгези эки, томаанныг оол чораан. Өөренип турган үезинде республика чергелиг хүреш маргылдааларынга идепкейлиг киржип, школаның бот-удуртулгазының кежигүнү болуп, класстан дашкаар хемчеглерниң идепкейлиг организакчызы турган.
2012 чылда 9 класс соонда Мерген-Херел Симчитмаа Ачинскиниң транспорт болгаш көдээ ажыл-агый колледжизиниң “мал эмчизи” салбырынче өөренири-биле кирип алган. Аңаа өөренип тургаш, сургуулдар аразынга хостуг хүрешке тулган чемпион чораан. Ачинск хоорайның көдээ ажыл-агый техникумунуң Аът спортунуң федерациязын база удуртуп турган. 2017 чылда “фельдшер-ветеринар” деп мергежилди чедип алган.
2015 чылда Россияның Шерииниң Чепсектиг күштериниң одуруунче келдирткен. 2019 чылда шериг албанын эрттирери-биле керээ чарып алган.
Керээ чарып алган баштайгы чылында танкыга удур ракеталар башкарар батареяның взводунуң чолаачы-механиги, килдис командири болуп ажылдаан.
2020 чылда ол-ла батареяның взводунуң оператору – машина командири турган. 2021 чылда сержант деп дайынчы атты тывыскан. 2022 чылда Украинада болуп турар тускай шериг операциязынга киришкен.
2022 чылдың март 30-де Донецк Улус Республикага тактиктиг батальон бөлүүнүң составынга националистерниң шаап халдаашкынын доктаадып, бодунуң туружун маадырлыы-биле тудуп, дайынчы эштерин деткип, шериг кезээниң дайынчы соруун бодунуң эрес-дидими-биле көдүрген. Мерген-Херел тайбың чурттакчыларны камгалаары-биле дайынчы хүлээлгезин төлептии-биле күүсеткен. Ынчалза-даа бодунуң эштерин камгалаар дээш, артиллерия снарядының бузундузундан дириг артар хире эвес балыгланыышкынны алган. Ол тулчуушкун шөлүнге чаңгыс эвес кижиниң тынын база бодунуң эш-өөрүн камгалаан маадыр. Мерген-Херел кезээде дайынчы хүлээлгезин төлептии-биле күүседип чораан. Ол дайынчы даңгыраанга, чер-чуртунга бердинген, шериг албанының бүгү-ле аар-берге оруктарын төлептии-биле чурттап эрткен.
Россия Федерациязының Президентизиниң 2022 чылдың апрель 25-тен тура Чарлыы ёзугаар дайынчы хүлээлгезин күүседип тургаш, көргүскен эрес-дидим чоруу, бодун хайырлавайн тулушканы дээш Мерген-Херел Борисович Симчитмааны Эрес-дидим чоруктуң ордени-биле мөчээн соонда шаңнаан. 2022 чылдың июль 14-те Тыва Республиканың Чазаанга ооң шаңналын чоок кижилеринге дамчыдып берген.
Мерген-Херел Симчитмаа өг-бүлелиг, ийи ажы-төлдүг. Бичиизи 1, улуу 3 харлыг. Ол бодунуң өг-бүлезинге улуг, чараш бажың, а оолдарынга эки өөредилгени, эртем-билиглиг кижилер болурун күзеп чораан.
2022 чылдың апрель 18-те Тес-Хем кожуунга кажыыдалдың хүнүн чарлаан. Маадырның чырык адынга тураскаадып, Россия Федерациязының, Тыва Республиканың, Тес-Хем кожууннуң күрүне туктарын бадырып, оюн-тоглаа хемчеглерин соксаткан.
2022 чылдың март 17-де Кызыл-Чыраа школазынга маадыр Мерген-Херел Симчитмааның партазын ажыткан. Бистиӊ төрээн чуртувустуӊ хосталгазы дээш демиселге бажын салган дайынчыларга мөӊге алдар!
Чыжыргана СААЯ белеткээн.
Чуруктарны өг-бүле архивинден алган.
“Шын” №8 2024 чылдың февраль 3
