Тускай шериг операциязының зоназында дайынчы даалгаларны күүседип турар дайынчыларны деткиир ажыл Тывада уламчылавышаан. Ол дузаның чугула угланыышкыны – тускай шериг операциязынга кончуг херек техниктиг дериг-херекселдерни, гуманитарлыг дузаны болгаш республиканың чурттакчыларының чыгган чүүлдерин ТШО зоназынче чорудары. Республикадан дуза чаңгыс чер чурттугларывыс дайынчыларның боттарынга чедип турарының херечизи – Тываның чурттакчыларынга болгаш регионнуң удуртукчузу Владислав Ховалыгның адынга дайынчылардан чагааларның кээп турары болгаш олар боттарының чагааларынга дуза дээш өөрүп четтиргенин илередип кааны.
“Бедик технологияларның дериг-херекселдеринден эгелээш өске-даа чугула херек чүүлдерге чедир дуза чыып, камгалакчыларга херек чүүлдерни чорудар дээш, бүгү-ле аргаларны ажыглап турар бис. Аал-чуртундан муң-муң километр ырак черге төрээн Тывазының чылыг-чымчак чоруун дайынчылар билип чорууру биске кончуг чугула. Бөгүн биске кол-ла чүүл – дайынчылар шупту чоок кижилеринге онча-менди эглип келири”— деп, Владислав Ховалыг социал четкиде бодунуң арнынга бижээш, Кутузов орденниг гвардейжи 55-ки мото-адыгжы (даг) бригаданың дайынчыларының ээлчеглиг дыңнадыын парлаан.
ТШО зоназында дайынчыларны деткииринге эрге-чагырга органнары, хөй-ниити организациялар, күш-ажылчы коллективтер, кожууннарның чагыргалары болгаш республиканың чурттакчылары киржип турарлар. Республиканың чурттакчылары дайынчылар албан-хүлээлгезин күүседип турары шериг кезектеринче техниктиг дериг-херекселдер, автотранспорт болгаш өске-даа гуманитарлыг дузаны чыырын болгаш ТШО зоназынче чорударын Тываның Чазаа биле Улусчу фронтунуң күүседикчи комитеди кады организастап турар.
Шериг кезектериниң чагыы-биле техниктиг дериг-херекселдерни садып алырынга херек акша дузазын регионда “Деткимче” (“Содействие”) фонд регионнуң удуртукчузунуң даалгазы ёзугаар чедирип турар. “Деткимче” фондунуң удуртукчузу Артыш Иргиттиң дыңнатканы-биле алырга, адрестиг акша-хөреңги дузазын күзелдиг кижи бүрүзү чедирип болур.
“Кызылдан чорудуп турар гуманитарлыг дузаны чыырынга организация болгаш кижи бүрүзү киржип, чижээлээрге, дрон азы мотоцикл дээн ышкаш техниктиг деткимчени бодунуң мурнундан чедирип болур. Шериг кезектериниң командирлериниң болгаш дайынчыларның боттарының чагыглары-биле “Деткимче” регион фондузу дамчыштыр техниктиг дериг-херекселдерни Тыва Республиканың Чазаа садып алгаш, ТШО зоназынче чорудуп турар. Дериг-херекселдерниң өртээ аар болганындан чагыгларның күүселдезин фондунуң акша-хөреңгизиниң шаа-биле боттандырып турар”— деп, Артыш Иргит демдеглээн.
ТШО-да дайынчыларга дузаны болгаш өске-даа материалдыг деткимчени республиканың чурттакчылары Улусчу фронтунуң регионда күүседикчи комитеди дамчыштыр чорудуп болур, ооң адрези: Кызыл хоорай, Чүлдүм кудумчузу, 40. Харылзажыр телефону: 2-20-50.
Ш. СУВАҢ.
Чурукту ТР-ниң Чазааның парлалга албанындан алган.