Март 7-де “Ада-чурттуң камгалакчылары” күрүне фондузунуң Тывада салбырынга ТШО-да киржип турар шериглерге автомобильдер дамчыдар ёзулал болган. Бо удаа ачы-дуза акциязынга Күрүнениң “Азас” заповеднигиниң ажылдакчылары киришкен.
Заповедниктиң директорунуң хүлээлгезин күүседип турар Буян Кара-Салдың чугаалап турары-биле алырга, машинаны бүрүнү-биле дайынчы ажылга белеткеп каан.
«УАЗ Патриот» болгаш «УАЗ-452» маркалыг автомобильдерден аңгыда, заповедниктиң ажылдакчылары дайынчыларга эргежок чугула херекселдерни: газ-биле ажылдаар плиталарны, машина херекселдерин база чыып белеткедивис. Оон аңгыда, чайгы дугуйлар, техниктиг үстер база өске-даа херек чүүлдерни бүрүнү-биле машиналар-биле кады дамчыдып тур бис” – деп, Буян Кара-Сал чугаалаан.
Заповедниктиң ажылдакчылары ооң мурнунда база шериглерге ачы-дуза акцияларынга доктаамал киржип турган.
“Бо чылдың январь айда шериглерниң чагыы-биле спутник харылзаазының комплектизин чорудуп берген бис. Ооң дузазы-биле ТШО киржикчилери боттарының чоок кижилери-биле харылзааже доктаамал үнер аргалыг болганнар”– деп, Буян Кара-Сал немээн.
Бодунуң ээлчээнде Бүгү-российжи улусчу фронтунуң Тывада салбырының төлээзи Александр Буланкин машиналар баштай Абаканга чедир боттары четкеш, оон улаштыр Россияның демир-оруунга дугуржулга ёзугаар төлевир чокка чоруур. Оон улаштыр 55-ки гвардейжи мото-адыгжы (даг) бригаданың дайынчыларынга чеде бээр.
“Автомашиналардан аңгыда, март 20-де Тывадан 5 тоннуң чүък машиназы республиканың чонунуң чыгган гуманитарлыг дузазын алгаш чоруур. Ында техниктиг дериг-херекселдер, чылыг идик-хеп, үр шыгжаттына бээр аъш-чем болгаш шериглерниң боттарының чагааны өске-даа чүүлдери бар” – деп, Александр Буланкин демдеглээн.
ТШО-да киржип турар дайынчыларга гуманитарлыг дузаны “Ада-чурттуң камгалакчылары” күрүне фондузун таварыштыр дараазында адреске дамчыдып берип болур: Кызыл хоорай, Кызыл партизаннар кудумчузу, бажың 30, ажыл хүннеринде эртенгиниң 9.00 шактан 18.00 шакка чедир ажылдап турар.
Чыжыргана СААЯ.
«ШЫН» №18 2024 чылдың март 9
