Тускай шериг операциязы эгелээнден бээр барык үш чыл чедип турар. Ол үениң дургузунда Тываның чурттакчы чону анаа черле олурбаан. Организация бүрүзү, кижи бүрүзү бодунуң шыдаар-ла шаа-биле үлүг-хуузун киириштирип, «Бүгү чүүлдү тиилелгеже!» деп кыйгының адаа-биле тускай шериг операциязында чаңгыс чер чурттугларынга материалдыг болгаш моральдыг дузаны, деткимчени чедирип турар.
ТР-ниң Иштики херектер яамызының Улуг-Хемниң муниципалдар аразының килдизиниң экономиктиг айыыл чок чорук болгаш коррупцияга удур ажыл чорудар бөлүүнүң улуг оперативтиг ажылдакчызы, полицияның капитаны Майдыр Бюрбю аңнаар боозун тускай шериг операциязында киржип турар чаңгыс чер чурттугларынче чорудар деп шиитпирлеп алганын чагырга чери дыңнаткан.
Майдыр Бюрбю Шагаа уткуштур тускай шериг операциязының киржикчилеринге ачы-дуза чыылдазының дугайында чарлалды номчааш, бодунуң аңнап чораан боозун дайынчы хөделиишкеннер девискээринде шериг оолдарга дамчыткан. Ооң боозу чаңгыс эвес дайынчының амы-тынын камгалаар дээрзинге бүзүрел быжыг.
«Бүгү чүүлдү тиилелгеже!» федералдыг төлевилелдиң ажыл-чорудулгазы-биле Улусчу фронтунуң регионалдыг салбыры Тываның Чазаа-биле гуманитарлыг дуза чедирер талазы-биле чогуур ажылдарны үзүк-соксаал чок организастап турар. Чылдың дөрт эргилдезинге дүүштүр дериг-херекселди, идик-хепти чыып турарын билир бис. Улусчу фронтунуң күжениишкинниг ажылының деткимчези-биле тускай шериг операциязында дайынчыларның хереглелдерин чедирип турар
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Тыва эки турачылар кудумчузу, 3 («Норзин» садыг төвү) азы Цеченлинг хүрээзи. Харылзажыр дугаары: 8 (39422) 2-10-50.
ТМГ-ниң медээлеринден.
«Шын» №4 2025 чылдың февраль 6