Дайынчыны утпаалыңар

Бо одуругларны, бир-ле дугаарында, амгы үеде аравыста чок, алдар-аттыг-даа, анаа бөдүүн-даа дайынчы бүрүзү — Маадырлар деп билип, оларга мөгейип, чүрээмниң ханызындан шорбаладым.

Ийиде, оттуг чаага маадырлыы-биле киржип чорааш, Ада-чуртка амы-тынын харам чокка өргээн Булуң-Терээм эрес-дидим оолдары Ростислав Александр (Баанай Түмерлан) Чойган-оолович, Кызыл-оол Алдын Сергеевич, Хенден Салават Николаевич, Докпут Аян Николаевич, Чүлдүм Орлан Андреевич дээш оон-даа өске Барыын чүктүң каттышкан эжелекчи үзел-соруунга удур бистиң аас-кежиивис, тайбың-чаагай келир үевис, ыдыктыг Ада-чуртувус дээш демисежип чораан хөй-хөй таныыр-танывазым төөгүде ады мөңге арткан төрээн Тывавыстың дайынчыларының чырык адынга тураскааттым.

Ынак төрээн чуртуң дээштиң
Ыдык арыг арын-нүүрүң
Тук дег бедик тудуп алгаш,
Тулчуп кирген дайынчы сен.
Дайзыннарга дүжүп бербес,
Дайынчыга дайын төнмес…
Эрээ-хинчек балыгларын
Экиртиптер ындыг эм чок.

Хүн дег чырык ады өлбес,
Хүлээлгезин күүседип каан,
Тайбың өй дээш тынын берген
Дайынчылар — Маадырлар.

Амыр-чыргал кыйгызы бооп,
Амыдырал йөрээли бооп,
Дайынчы сээң алдар-адың
Таңмаланып артып калды.

Чоктаашкынның аарышкызын
Ыдамнаптар, намдадыптар
Чоргааралдың күштүг дому
Ырыларга сиңе берзин.

Өшкен-не дээш одаг орнун
Таптай базып эртпээлиңер.
Өлген-не дээш, читкен-не дээш,
Дайынчыны утпаалыңар.
22.06.24

Буян ЁНДАН.

“Шын” №49 2024 чылдың июль 3