Россия Федерациязының Даштыкы херектер яамызының Красноярск край, Тыва болгаш Хакасия талазы-биле төлээзи бистиң республикада албан ажыл-херектер аайы-биле чедип келген Артём Захаров-биле Тываның Баштыңы Владислав Ховалыг ужурашкан.
Россия Федерациязының херектериниң талазы-биле Эритреяга түр када төлээниң албан-хүлээлгезин чартык чыл дургузунда күүседип, сургакчылап чорааш, чедиишкинниг ажылдааны-биле дипломатка Владислав Ховалыг байырны чедирип, кол албан-дужаалы Даштыкы херектер яамызының Красноярск край, Тыва болгаш Хакасия талазы-биле төлээзиниң албан-хүлээлгезинге чедиишкиннерни күзээн.
Тывага чоокта чаа болуп эрткен чурттар аразының “Тыва: Агроинвест – 2025” шуулганның түңнелдери-биле холбаштыр Россиядан Моол болгаш Кыдатче угланыышкынныг бистиң планнарывыска хамаарыштыр кады ажылдажылга дугайында Артём Захаров-биле ужуражыышкын үезинде чугаалашканын регионнуң удуртукчузу дыңнаткан.
Даштыкы чурттар-биле харылзааларны тургузарынга болгаш кады ажылдажылганы чорударынга Даштыкы херектер яамызының деткимчези Тывага, эң ылаңгыя российжи-моол күрүне кызыгаарында хөй талалыг “Хандагайты” эрттирилге пунктузу 2025 чылда ажылдап эгелээринге чугула херек дээрзин Владислав Ховалыг демдеглээн. Бо эрттирилге пунктузунуң ажылы чайгаар бүде бербес, ону шуудадыр дээш, чурттар аразында дипломатияга база күжениишкинниг ажылдаар апаарын, ооң түңнелинде Тываны дамчыштыр чурттар аразынга коридор тургустунар, республикага оруктар четкизи болгаш орук чоогунуң инфраструктуразы сайзыраарын регионнуң удуртукчузу демдеглээн.
Ш. МОНГУШ белеткээн.
Чурукту интернет четкизинден хоолгалаан.
“Шын” №13 2025 чылдың апрель 10