«Эрес-дидим чоруу дээш» деп медаль — Совет Эвилелиниң база Россияның шериг албанныгларының аразынга солдаттар болгаш офицерлерни хүндүткээн эң-не дээди шаңнал. Ол дээди шаңналга бистиң чаңгыс чер чурттуувус Айлун Монгуш база төлептиг болган.
Айлун Романович Чадаана хоорайга төрүттүнген. Ол Саратов облазынга тускай сорулгалыг ракета шериинге шериг албанын бир чыл чартык хуусаа дургузунда эрттирип тургаш, бирги погоннарын кеткен. Аңаа боо-чепсек адарының база харылзаачының эге билиглеринге дыка эки өөренип алган. Ол шериг соонда төрээн чурту Адар-Төшке аңнап-меңнээринге улуг сонуургалдыг турган.
Тускай шериг операциязының эгезинден тура «Вагнер» хуу шериг компаниязының одуруунче боданмайн-даа, эки тура-биле чорупканын Айлун Романовичиниң өөнүң ишти чугаалаар. Боо-чепсек тудар эки дуржулгазы аңаа дыка-ла ажыктыг болган. Ол ТШО-га снайпер турган. Тывадан 30 чаңгыс чер чурттуу-биле кады Клешеевка суурнуң девискээринге какпа-дузак салып, дайзыннарны туткаш, командылакчыларга хүлээдип берип турганнар. Ол дошкун тулчуушкуннар үезинде 20 дайынчы эш-өөрүн чидирген.
«Медальды чүү дээш алдым? Билбес-тир мен. Азы эштерим оолдар дузалашкан ирги бе… Тулчуушкун үезинде чеди кижини дайын шөлүнден үндүрдүм, олар эмнелгеден үнүп келгеш, меңээ четтиргенин илередип турдулар. Дайын-чаага кымның кандыызы көстүп келир. Бодун камгалап өөренир херек, кашпагай болур, ат-алдарын база камгалап чоруур болза эки» — деп, Айлун Монгуш чугаалаан.
Эки турачының дайынчы оруун чурттуң Дээди кол командылакчызы үнелээн. 2024 чылда Россия Федерациязының Президентизиниң Чарлыы-биле Луганск Улус Республикага тулчуушкуннар үезинде эрес-дидим чоруу дээш база күрүнениң айыыл чок чоруун хандырар талазы-биле тускай даалганы амы-тынын харам чокка күүсеткени дээш А.Р. Монгушту «Эрес-дидим чоруу дээш» деп медаль-биле шаңнаан.
А.Р. Монгушка шаңналды Тыва Республиканың шериг комиссарының хүлээлгезин түр үеде күүседип турар Евгений Терехов тывыскан.
А. СОЯН белеткээн.
“Шын” №85 2024 чылдың ноябрь 6
