"Сүбедей" спорт ордузунга октябрь 5–6 хүннеринде Россияның камгалал сайыдының Кубогу дээш найыралчы чурттарның шериг командаларының аразынга спортчу хүрешке 2 дугаар делегей чергелиг маргылдаазы, сорулга ёзугаар шериг спортун сайзырадыры, аныяктар аразынга төлептиг чорукту оттурары, өөредири, чурттар аразында найыралдыг чорукту быжыглаары-биле бедик деңнелге болуп эрткен. Маргылдааның кол шаңналы дээш Беларусь, Тунис, Казахстан, Моол база Россиядан 2 команда, ниитизи-биле 6 шериг командазындан 72 мөге чуртунуң адын камгалаары-биле, ачыр-дачыр хүрешкен.
Дугуржулга езугаар октябрь 4–5-те "Херел" спорт залынга база Чадаанага элээди оолдар аразынга мастер-класстарны олимпий чемпионнары Сослан Рамонов, Давид Чакветадзе база Европаның 3 дакпыр чемпиону Опан Сат хостуг болгаш грек-рим хүрештерге боттарының ынак аргаларын база хүрештиң дүрүмнерин улуг көдүрлүүшкүн-биле чорутканнар.
Маргылдааның ажыдыышкынында ТШСК (ЦСКА) удуртукчузу Артем Громов найыралчы чурттарның төлээлеринге бедик спортчу чедиишкиннерни күзеп, база бо Делегей чергелиг маргылдаа ам-даа бедик деңнел чедир сайзыраары дээш байырны чедирген. Улаштыр Чазак Даргазының оралакчызы Орлан Сарыглар делегей чергелиг маргылдааның элээдилерге, аныяктарга үлегерин, кадык амыдыралче чүткүлүн, спортка хандыкшылын оттурарынга ажыктыын тайылбырлааш, мөгелерге спортчу тиилелгелерни күзээн. Улаштыр кызымаккай ажыл-ижи дээш Чазак Баштыңының шаңналдарын дараазында удуртукчуларга тывыскан. ТШСК-Тываның директору Буян Биче-оолга, Луганск Республиканың Спорт яамызының оралакчы сайыды Валентина Гамаеваны, Россияның Күш-культура болгаш спорт яамызының 100 чылдааны деп медаль-биле база 41 дугаар армияның подполковниги Иван Кувырзинге Буян-Бадыргының II чадазының орденин тывыскан. Ол ышкаш Камгалал яамызының талазындан хөй-хөй мактал бижиктерни мөгелерге тывыскан.
Ийи хүн уламчылаан маргылдааның түңнелинде командалар аразынга 1 дугаар черни Россия, 2 дугаар черде Белоруссия, 3-кү черни Моолдуң, Казахстанның, Тунистиң командалары үлешкеннер. Хостуг хүрешке килдер аайы-биле тиилелге дээш хүрештерге Россияның чыынды командазындан: 57 килге тыва мөгелер Кежик Седен, Аяндай Ондар, Амир Чамзын 1–2–3 дугаар шаңналдыг черни алганнар; 65 килге Альберт Тумат, Азия чемпионадының 2024 чылда хүлер медализи, моол мөге Сом-Бадыраага ойнаткаш, 2 дугаар болган; 74 килге Сайын Казырык делегей чергелиг спорт мастери Тимур Бижоевке сан талазы-биле аштыргаш, 2 дугаар болган; 86 килдиг мөгелер аразынга тускай чараш хүрежи-биле аныяк мөге Баяр-Сайхан Бады өскелерден ылгалып, 1 дугаар черге төлептиг болган; 97 килге Бады-Маадыр Самдан, 37 харлыг, дуржулгалыг делегей чергелиг спорт мастери Алимбек Казанбаев-биле ачыр-дачыр тутчуп, 13 биле 11 кылдыр ойнааш, 1 дугаар черни алган; 125 килдиг мөгелер аразынга 3-кү черни Айдың Монгуш алган.
Тиилээн база шаңналдыг 2–3 дугаар чер алган командалар Россияның Камгалал яамызының хүндүлел бижиктери, кубоктары, медальдары-биле шаңнатканнар. Тускай шаңналдарны “Эки шииткекчи” Россиядан Меңги Санаа, Анатолий Сулдереков алганнар.
Маргылдаа үезинде республиканың спорт сайыды Субудай Монгуш база Спортчу хүреш федерациязының даргазы Буян Бурбучук, ТШСК-Тываның директору Буян Биче-оол бо 2 дугаар Делегей чергелиг маргылдааны Тывага хостуг хүрештиң 65 чылдаан оюнга уткуштур улуг байырлал болганын демдеглээннер. База ол ышкаш Делегей чергелиг маргылдааның чурумнарынга, дүрүмнеринге чедер-четпестерниң барын, оларны дараазында маргылдааларга чедир эдерин сүмелешкеннер.
/ Алексей ЧАМБАЛ-ООЛ, спорттуң хоочуну.
Буян ООРЖАКТЫҢ тырттырган чуруктары.
“Шын” №77 2024 чылдың октябрь 9
