Дээрде ушкан куштуң санын канчап үндүрер боор? Ол-даа берге айтырыг-дыр деп, бөдүүн номчукчу бодаар. Эртемденнерге ол нарын айтырыг эвес, шагда-ла куштарның санын илередип шыдапкан.
Колдуунда Африкада чурттап турар 13 сантиметр хемчээлдиг кызыл думчуктуг бора-хөкпешке дөмей ткачиха деп адаар куштуң саны 1,5 миллиард чедип турар. Кажан бо куштар дээрге ужуп эгелээрге, хүннү булут дуглааны дег апаар. Ынчан хүн туттуруушкуну болган дег, барык 6 шак дургузунда Африканың чурттакчылары хүн көрбейн баар. Ол куш гектар-гектар черлерни чаңгыс шакта хоозурадып, чер ажыл-агыйлыг фермерлерге улуг когаралды чедирип турар.
База бир хөй санныг кушка Вильсоннуң океанниги деп адаар далай кужу хамааржып турар. 2024 чылда эртемденнерниң санаашкыны-биле 8 сая чедип турар. Бо куштуң хемчээли хараачыгайдан улгатпас. Далай кырынга кончуг дүрген ужудар куш болуп турар.
Оон аңгыда, бистиң таныырывыс бора-хөкпештерниң саны миллиард чедип турар. Амгы үеде 27 хевири бар. Бо куш чүгле Антарктидада, Соңгу чүкте чок.
Кыдатка бора-хөкпештер рис шөлдеринге когарал чедирер боорга, Мао Цзэдун ол куштарның когун үзе узуткадып каан. Ооң соонда рис шөлдеринге курт-кымыскаяк көвүдээш, шуут чүү-даа чок арткан. Ол үеде он-он сая кижилер аштап өлген. Ынчан Чазаа катап база бора-хөкпештерни өске чурттардан дажып эгелээн. Кижиниң чуртталгазынга бора-хөкпештиң ролю ол хире чугулазын кыдаттарның дуржулгазы бадыткаан.
Медээни, чуруктарны интернет четкизинден алган.
“Шын” №2 2025 чылдың январь 23
