“Спортчу элитаның” тергиини, Россияның спорт мастери, Россияның кикбоксингиге 4 дакпыр чемпиону, делегей чемпиону Төрепчи Доңгакка «2024 чылдың спортчузу» деп атты байырлыг байдалда тывыскан.
Адакталып турар чыл Төрепчи Доңгакка бедик үре-түңнелдиг болган. Ынчалза-даа ол чаа-ла 24 харлыг. Ёзулуг кайгамчык чедиишкиннер аныяк спортчунуң мурнунда. ONE Championship деп Делегейде кончуг дээн чалгып турар ат-сураглыг эвилелдиң Тывадан бир дугаар кежигүнү база болган. Ак-Довурактан бөдүүн оол, бо үеде делегейниң чемпионнар белеткээр эң-не тергиин залдарының бирээзинде улуг күжениишкинниг белеткенип турар.
Тиилелгениң артында хөй-хөй аштырыышкыннар турар. Төрепчи Доңгак ону кымдан-даа артык эки билир. Эге дээрезинде Ак-Довуракка болуп эртип турган маргылдааларга бо-ла аштырып алыр турган. Ынчалза-даа бодунуң күзелин чедип алыр дээш, залга белеткелдерин оон-даа артык күштелдирип-ле турган. Ол 5-ки класска чедир хостуг хүреш секциязынче барып турган, чоорту өөрлериниң аайы-биле кикбоксини сонуургай берген. Арга-дуржулгалыг тренер Мөңгүн-оол Иргит быжыг тура-соруктуг, чаныш-сыныш чок бичии оолду дораан эскерип каан. Белен чүүл кайда боор, бергелер турган. Ынчалза-даа дүжүп бербейн, изиг чүткүлү-биле делегейниң чемпиону болган. Спорттуң ачызында ол чүгле ат-алдарны эвес, а акшаны база ажылдап ап турар апарган. Амгы үеде ол кикбоксингиниң делегей сылдыстарының бирээзи. Төрепчи Доңгак чалыы чаңгыс чер чурттугларынга улуг үлегер-чижек.
Чурукту Интернет четкизинден алган.
“Шын” №100 2024 чылдың декабрь 28
