📢 Сорулгазы – ёзулуг уран-талантылыг, угаангыр аныяктарны тып шилиири. Россияныӊ аныяктарыныӊ XXI-ги Дельфий оюннары Красноярк хоорайга апрель 22-27-де болуп эрткен.
Дельфий оюннары –салым-чаяанныг аныяктарныӊ олимпияадазы ышкаш чидиг адааннажылгалыг маргылдаа. Аӊаа чурттуӊ 79 регионнарындан 2800 хире аныяктар киришкеш, эртем-техника, уран чүүл дээш янзы-бүрү адырлар талазы-биле шупту 34 дисциплинага билиг-мергежилин тергиин эки билиринге мөөрейлешкен.
📢Тываныӊ 41 кижи составтыг делегациязынга делегей, бүгү-российжи, республика чергелиг мөөрейлерниӊ тиилекчилерин, салым-чаяанныг оолдар, уругларны шилээн.
❗Ай-Мерген Ооржак «Ус-шевер ажылдар» номинациязынга алдын медальды чаалап алган. Ол - 2021 чылда Worldskills Russia - регионалдыг «Аныяк профессионалдар» деп мөөрейниӊ 1 чадазыныӊ лауреады.
«Азас» деп хореография ансамбили «Улустуӊ танцы-самы» номинацияныӊ, «Чаӊгы-Хая» фольклор ансамбили «Улустуӊ ырларыныӊ ансамбльдиг күүселдези» деп номинацияныӊ, Ондар Сайдай «Улустуӊ ырын чааскаан күүседири» деп номинацияныӊ дипломантылары болган. Олар шупту Кызылдыӊ А.Чыргал-оол аттыг уран чүүл колледжиниӊ студентилери.
Россия Федерациязыныӊ ЮНЕСКО-нуӊ ажыл-херектериниӊ талазы-биле комиссиязыныӊ өмээржилгези, Делегейниӊ Дельфий комитединиӊ деткимчези-биле болуп эртер хемчегни Коми Республика келир чылын эрттирер.
Р.Демчик.
