“Демография” төлевилел

Ак-Довурак хоорайда бо хүннерде 60 олуттуг чаа уруглар садының тудуу дооступ турар. Ону “Каменщик” КХН-ниң тудугжулары хүлээнип алган тудуп турар. Хүлээникчи организацияның удуртукчузу Айдыс Монгуштуң чугаазы-биле, ажыл көрдүнген графикти шагда-ла мурнап турар, бо хүннерде барык 80 хуузу кылдынган:

''Бо уруглар садын “Демография” национал төлевилел ёзугаар эрткен чылдың сентябрь 8-тен тура тудуп эгелээн бис. Ниити программа ёзугаар көрдүнген акшаландырыышкыны 99 сая рубль. Ол акша-түңнүң иштинде тудугдан аңгыда иштики дерилгези,чаштарның удуур-чыдар орун-дөжээ, эт-севинден эгелээш, шуптузу кирип турар. Бо уруглар садының даштында девискээри, уруглар ойнаар шөлүнден эгелээш кылгаш, ээлеринге дүлгүүрүн август айда хүлээдир бис. Организациявыста доктаамал ажылдап турар бригадалардан аңгыда, тус черниң оолдарын хаара тудуп, ажыл-биле хандырган бис. Ниитизи-биле бистиң организациявыс республикада үш дугаар уруглар садын тудуп доозуп турарывыс бо'' - деп, хүлээникчи организацияның удуртукчузу чугаалады.

“Каменщик” КХН-те прораб Ачыты Хертек Тываның политехниктиг институдун 2014 чылда дооскаш, тудуг ажылында 6 чыл дуржулгазын бедидип ажылдап турар. Организацияда 32 харга чедир аныяктарны хаара туткан. Оларның кылган ажылының аайы-биле акша-шалыңын үе-шаанда төлеп берип турар. Эң адаккы шалың кылдыр 31 муң рубльди холга ап турарын прораб дыңнаткан.

Хоорайның чаштарының четтикпейн манап турары бо чаа үениң негелдезинге дүүштүр тудуп кылган уруглар садын август айда ажыдар дээн. Ынчалдыр Ак-Довуракта бар 7 уруглар садынга сес дугаар уруглар сады немежир.

К.Монгуш.

Чуруктар авторнуу.