Депутат харылзаада: Дузалажырынга белен.

«Чаӊгыс демниг Россия» партиязыныӊ регионалдыг салбырыныӊ секретарыныӊ оралакчызы, Дээди Хуралдыӊ депутады Аяс Мөӊге бир дугаар хүлээп алыышкынын эрттирген.
«Депутат болганымда, хамаатыларны бир дугаар хүлээп алдым. Энергетиктер микрорайонунуӊ чурттакчыларыныӊ өмүнээзинден келген идепкейлиг хамаатылар-биле ужураштым. Хөй аал чурттаар бажыӊнарда канализация каш чылдар дургузунда чурттакчыларны дүвүредип келген-даа болза, ол айтырыг шиитпирлеттинмейн турар. Ында чеди бажыӊ бар, септиктериниӊ берге байдалы эгезинде-ле турган болуп турар. Каш чыл бурунгаар ол микрорайонга канализация станциязын кылып каан дээрзин билир мен. Агып баткан сугларны ол хоорайныӊ хоорзаларлыг четкизинче бадырар ужурлуг. Ынчалза-даа кезек чылдагааннар-биле ол станцияны ажыглавайн турар. Бөгүнге чедир ында сугну чүгле тускай техника дузазы-биле сордуруп келген. Чер болгаш өнчү-хөреӊги яамызы, «Водоканал-Сервис» КХН ол бергедээшкинни дыка эки билир-даа болза, ону шиитпирлээринче болур-чогууру-биле кичээнгей салбайн турар деп санаар мен. Ону сайгаржып чугаалажыр бис.
Ажыы-биле чугаалажып, айтырыгларны шиитпирлээринге белен мен, Дээди Хуралга чедип келгеш, ужуражып азы соцчеткиге бижип болур силер, үргүлчү харылзаага турар мен» — деп, чоокта чаа соӊгуттурган депутат Аяс Мөӊге тайылбырлаан.
«Чаӊгыс демниг Россия» партиязыныӊ регионалдыг салбырыныӊ медээзи-биле Р. Демчик белеткээн.