Апрель 19-та Дээди Хуралдың сески сессиязының ээлчеглиг дөрткү хуралы болуп эрткен. Ону парламентиниң Даргазы Каң-оол Даваа башкарып эрттирген. Депутаттар 75 айтырыгны чугаалажып көрген. 18 хоойлуну хүлээп алган.
Бюджет болгаш социал политика, тус чер бот-башкарылгазынга, өнчү-хөреңги харылзааларынга болгаш соңгулда айтырыгларынга хамааржыр хоойлу төлевилелдерин сайгарып чугаалашкан. ТР-ниң Кижиниң база Уруг-чаштың эргелериниң, Сайгарлыкчыларның эргелерин камгалаарының талазы-биле бүрүн эргелиг төлээлериниң институттарының ажыл-чорудулгазын организастаарының айтырыгларын чаартып турар бөлүк хоойлуларны база хүлээп алган.
РФ-тиң субъектилериниң күрүне эрге-чагыргазының организастаашкынын чаартырының талазы-биле регионалдыг хоойлужудулганы федералдыг хоойлужудулгага дүүштүрериниң ажылы уламчылаан. Федералдыг хоойлунуң чамдык эгелеринге өскерилгелерниң күштүг болуп киргени-биле ТР-ниң Конституциязынга чогуур өскерилгелерни база киирген.
Өскүс уругларныӊ болгаш ада-иезиниӊ хайгааралы чок арткан уругларныӊ социал деткимчезинге хамаарыштыр немелде магадылалдарныӊ дугайында хоойлуда айыттынган категорияга хамааржыр кижилер дээди эртем чедип ап турда, немелде магадылалдар тургузар кезээнге өскерилгелер киирер саналдар деткимчени алган. Тодаргайлаарга, уруг өөренип турар үезинде ада-иезин иелдирзин азы чаӊгызын чидирген таварылгада, өөредилгениӊ төлевирлиг хевиринден бюджетче шилчидер эрге, бюджет акшазы-биле бакалавриат болгаш специалитет программаларыныӊ квотазыныӊ иштинге өөренир кылдыр хүлээп алырынга хуусаа чок эргени бээри магадылаттынган.
Үлетпүр төлевилелдеринче инвестициялар хаара тударын деткиир хоойлу-дүрүмнүг баазаны тургузар сорулга-биле ажылдап кылган үлетпүр политиказының дугайында регионалдыг хоойлуже эдилгелерни депутаттар чаңгыс үн-биле деткээн.
«2023 чылда Будда Шакьямуниниң төрүттүнген хүнүн, чырык угаанныг болу бергенин болгаш мөңгеде дыштаны бергенин байырлаарының дугайында» Дээди Хуралдың доктаалы хүлээп алдынган. Ол ёзугаар байырлыг хүннү 2023 чылдың июнь 4 деп доктааткан.
ТР-ниң Адвокаттар палатазының чанында квалификация комиссиязының кежигүнүнге – ТР-ниң Дээди Хуралының (парламентизиниң) төлээзинге чаа кордакчыны көрген. Ол албан-дужаалга Виталий Намнан-оолович Майындыны томуйлаан.
Сессия үезинде ТР-ниң Кижиниң эргелериниң талазы-биле бүрүн эргелиг төлээзиниң 2022 чылда ажыл-чорудулгазының түңнелдериниң болгаш бо чылда чугула сорулгаларының дугайында отчедун дыңнаан.
Депутаттар федералдыг хоойлулар төлевилелдерин, а ол ышкаш РФ-тиң хоойлужудулга органнарының бот-саналдарын деткээн доктаалдарны база бадылаан.
/ ТР-ниң Дээди Хуралының парлалга албаны.
Буян ООРЖАКТЫҢ тырттырган чуруктары.
"Шын" №29 2023 чылдың апрель 22
