Хөй ажы-төлдүг өг-бүлелер үш дугаар азы ооң соонда-даа төрүттүнген уругга 450 муң рубль деткимче акшаны чурттаар оран-сава ипотеказынче киириштирип болур.
Күрүнениң шак ол деткимче акшазын алырда кандыг документилер херегил, кайы хире үе дургузунда манаарыл, банк барбайн канчаар ажыглап болурул дээн ышкаш айтырыгларга харыылаар-дыр бис.
Ипотека алган банкызынга баргаш, субсидиязын ипотека дуглаарынга ажыглаар дугайында билдириишкинни кииргеш, херек документилерни кожуп каар. Банк ажылдакчызы клиентизиниң документилерин хынааш, ДОМ.РФ-тиң операторунче дамчыдыптарга, база катап хыналданы эртер. Банк барбайн Госуслуги таварыштыр билдириишкинни киирип болур.
Бир эвес ипотека төлеп турар өг-бүлениң өрези 450 муңдан эвээш болза, өрезинге дүүштүр субсидия акшаны ажыглаар. Субсидия акша ипотеканың кол өрезинче кирер ужурлуг. Ынчалза-даа кол өре субсидиядан эвээш болза, субсидияның арткан кезиин хууларны төлээринче киириштирип болур. Субсидияны ипотекаже киириштирген соонда, акша артып каар болза, ону өске хуулуг чээли агар санынче-даа шилчитпес, акша кылдыр уштуру-даа болдунмас. Өг-бүле субсидия акшаны ипотекаже киириштирген деп санаар. Шак-ла ындыг күрүне деткимчезин өг-бүле бүрүзү чүгле чаңгыс катап ипотека төлээринге ажыглап болур. Чижээлээрге, өг-бүлениң үш дугаар өпеяазы 2019 чылда төрүттүнген дижик, ону ипотека төлевиринче ажыглаан болза, дараазында 2022 чылда төрүттүнген төлге ук программаны ажыглавас.
Ипотека алган ада-иениң кайы-бирээзи азы хүлээникчи (поручитель) субсидияны ажыглап болур. Ол кижи үш ажы-төлдүң адазы азы иези болур. Ажы-төлүнүң бирээзи 2019 чылдың январь 1 соонда төрүттүнген болур ужурлуг.
Ипотека чээлизинге субсидия ажыглаар дээн хамааты 2021 чылдың апрель 30-ге чедир хүлээникчи кылдыр керээге ат салган болза, база чээлиге алган оран-савада үлүглүг кылдыр киир бижиттинген болза, субсидиязын ажыглап болур. Ийи дугаар бүле туткан өг-бүлениң ажы-төлүнүң адазы азы иези аңгы болза, оларның баштайгы ажы-төлү ук санче кирбес. Азыранды ажы-төлге ук программаны ажыглап болур. Ынчалза-даа уругну азыраан ай, хүнүн эвес, а төлдүң төрүттүнген хүнүн барымдаалаар. Бир эвес үш ажы-төлдүң бирээзи чок апарган болза, өлген дугайында херечилелди кожар. Чок-даа болган төл санче кирер.
Ипотека чээлизиниң негелделерин өскерткен болгаш ипотеканы төлеп чадап турган байдалдарны субсидия ажыглаарынга барымдаалавас. Негелделерин чиигедир өскертип каан-даа ипотека чээлизинге күрүне субсидия деткимчени албан бээр. Субсидия алыкчызы болгаш ооң ажы-төлү доозазы Россияның хамаатылары болуру чугула. Ажы-төлдүң төрүттүнген дугайында херечилелиниң артында «Россияның хамаатызы» деп бадыткалдыг таңма турар. 2018 чылдың октябрь 1-ден эгелээш, ажы-төлдүң хамааты байдалын ада-иезиниң хамааты байдалы-биле тодарадыр апарган. Субсидия дээш үндүрүг төлевес. Бир эвес өг-бүле квартира садып ап тургаш, тырттырган үндүрүүн ажыглаан болза, 450 муң акшаның 13 хуузу болур 58 500 акшаны күрүне эгидип бээр ужурлуг. Ол дугайында үндүрүг инспекциязы-биле баш бурунгаар консультациялап алыры чугула. Бир эвес ипотека чок болза, 450 000 акшаны ажыглаары болдунмас. Ам алыр ипотекага баштайгы төлевир кылдыр ажыглаттынмас. Чүге дээрге ук деткимче акша чүгле ипотека төлевиринче кирер ужурлуг. Төлеп турар ипотеказынче субсидия киириштирер деп билдириишкин киирген соонда, чеди ажыл хүнүнүң дургузунда манаар. Хыналда эрткен соонда, беш ажыл хүнүнүң дургузунда акшаны шилчидиптер. Аңгы-аңгы байдалдарның уржуундан үстүнде айыттынган хуусаалар узай берип болур. Субсидия акша шилчээн соонда, төлээр өре ам-даа арткан болза, улаштыр ай санында каш акша төлээриниң чаа чурумун Домкликте хууда кабинедиңерден азы Онлайн СберБанкыдан көрүп ап болур силер.
А. ОНДАР белеткээн.
Чурукту интернет четкизинден алган.
«Шын» №35 2024 чылдың май 15
