Чоокта чаа Кызыл кожууннуң Сукпак сумузунда «Өлчей» найыр-дой өргээзинге тускай шериг операциязының киржикчизи, аныяк ада Адар Анатольевич Ооржак үшкү кызының хылбык доюнче эш-өөрүн, дөргүл-төрелин чалаан. Улуг назылыг төрелдериниң санынга кирип, бис база бичии чаштың чараш доюнга кириштивис.
Найыр-дойга баргаш, сонуургаан чүүлүвүстү чаңгыс чер чурттугларывыска дыңнадып, оларның арга-дуржулгазы аныяк-өскенге үлегер-чижектиг болурунга идегедивис.
Аныяк ада Адар Ооржак тускай шериг операциязынга киржип тургаш, шөлээзиниң үезинде кээп, уруунуң доюн эрттирип турганы ол. Хылбык дойнуң столунда чаагай аъш-чем, янзы-бүрү суксун-хандылардан өске, чаңгыс-даа арага аймаа чок. Аныяктарның бо чараш байырлалын магадап көрүп, өскелер-даа шак мынчаар эрттирер болза эки-дир деп чугаалажып олурдувус.
Ада-иелери-биле келген бичии чаштар база хөй. Оларда база тускай башкарыкчы бар. Кежээге келген аалчыларга янзы-бүрү оюннарны база лотереяны-даа ойнаткан. Лотереяда дириг хойдан эгелээш, 20 литр кывар-чаар чүүл, ойнаарактар, хомус, аъш-чем аймаа дээш чүү-даа бар. Куруг билеттер барык чок хире. Хөй арага-дары садарының орнунга, хемчегни мынчаар чараш кылдыр организастааны өөрүнчүг болду.
Бичии чашка белек-селек кылдыр кирген акша-хөреңгини банкыга хуулары немежип чыдар агар сан ажыдып бээр болган. Ону банкыга ада-иези баргаш, уругнуң каш харлыынга чедир агар санны ажыдарын дугуржуп алыр. Уруг ол назын четкижеге чедир акшазы немежип чыдар болур.
Келген аалчылар мал-маганны-даа салып-ла турар. Белек-селек-даа хөй.
Бо аныяк өг-бүле дөрт кыстыг. Хылбык-дойну ынчаар чараш, солун кылдыр эрттирерин боттары шиитпирлээн. Бис, кырган-авалары, даай-авалары, оларның бо эгелээшкинин деткип тур бис. Араганы чоор боор ону!
Анай КАРА-ООЛ, хоочун башкы.
“Шын” №73 2024 чылдың сентябрь 25
