Каа-Хем кожууннуң Ильинка суурга «Чурттаарынга таарымчалыг хоорай хүрээлеңи» федералдыг төлевилел-биле чаа сесерликти кылып дооскан. Көдээ суурга чаа кылган сесерликтиң ажыдыышкынынга суурнуң улуг-биче чону доозазы чыглып келген. Оон аңгыда, кожуун чагыргазының төлээлери база келген.
Сесерликти Социалистиг күш-ажылдың Маадыры, ТР-ниң алдарлыг ажылдакчызы Дойбан Дапьяновна Давааның ады-биле адаан. Долдур чашпан үнген шөлдү чаагайжыды кылгаш, хөй-ниитиниң дыштаныр чери кылдыр «хуулдурупкан». Ында узун сандайлар, чагылар баштарында сайгылгааннар, бок октаар тускай савалар бар апарган.
Ильинка сумузунуң чагырыкчызы С.О. Чульдумнуң чугаалап турары-биле алырга, ажылды хүлээнип алган хууда сайгарлыкчы А. Кууларның кылган ажылы шынарлыг болгаш чогуур үе-шаанда хүлээткен.
«Чурттаарынга таарымчалыг хоорай азы суур хүрээлеңи» федералдыг төлевилелдиң онлайн бадылаашкынынга Ильинка сумузу эрткен чылын киришкеш, эң-не хөй үннү алган. Ынчангаш ук суурда бо төлевилел боттанганы бо.
Келир 2023 чылда шак-ла бо төлевилел Каа-Хем кожууннуң Дерзиг-Аксы биле Бояровка сумуларынга боттаныр дээрзин сагындыраал.
