Дүүн кежээ Ий биле Адыр-Кежиг суурларның электроэнергиязын катап кошкан. Ол суурларның электроэнергиязын дизель генератор хандырып турар болгаш өрт үезинде үзүктелиишкинге таварышкан турганын эде септээн.
Доора-Хемниң дузалал станциязының ток күжүн чада аайы-биле берип эгелей берген. Кожуун төвүнүң электри хандырылгазын өрегелерге 85 хуу тургускан. Артканын чоокку үеде кожары көрдүнген. Суурнуң чырык хандырылгазын түр схема-биле Доора-Хемде оперативтиг хемчег ёзугаар эккелген тос дизельдиг генератор хандырар. Дизельдерниң ажылчын күжү 1630 киловатт. Бо ажылда 50 хире кижи хаара туттунган.
Түр хуусаалыг схема ёзугаар чырык хандырылгазын тургускан соонда, Тожунуң ДЭС долузу-биле катап тургузары көрдүнүп турар. Деригниң өрттенген иштики кезектерин солуур ажылдар адакталган, дөрт чаа генераторларны кожар ажыл эгелей берген. Ооң ийизи Доора-Хемде чеде берген, артканнарын улуг-хүнде чедирер. Келир неделя дургузунда ажылды долузу-биле доозарын төлевилеп турар.
"Россети Сибирь Тываэнерго", "Восток" болгаш "Бастион" компанияларның удуртукчуларынга ыраккы кожуунга боттарының техникаларын үндүрүп берип, дериг-херекселдерни дажыглап сөөртүрүнге болгаш тускай мергежилдиг бригаданы тургузуп бергенинге улуу-биле өөрүп четтиргенивисти илередип тур бис. Ажылчыннарга изиг аъш-чемни кылып берип сеткилинден дузалашкан тожужуларның буянныг сеткилин онзагайлап демдеглеп тур бис.
