Бөгүн Тываның 11 класстың 2285 доозукчулары чуртталгазының эң-не шиитпирлиг базымын кылып турар. 120 ажыг доозукчу өөредилгениң тергииннериниң санынче кирип, алдын болгаш мөңгүн медальдарга төлептиг болганнар.
Өөреникчилеринге сагыш-сеткили-биле бердинген быжыг тура-соруу дээш, оларга көргүскен улуг деткимчези, ханы ынакшылы дээш база чымыштыг башкылаашкын ажылының үре-түңнелдери дээш башкыларга өөрүп четтиргенин илередип тур мен.
Хүндүлүг ада-иелер! Силерниң ажы-төлүңерниң баштайгы коңгадан доозукчу кежээниң байырлалынга чедир бо эрткен солун болгаш белен эвес орукту кады эрткен улуг күжениишкиниңерни онзалап демдеглеп тур мен. Уругларыңарның моон-даа соңгаар чедип алыр хөй-хөй чайынналчак чедиишкиннери силерни ам-даа өөртүп-ле турар болзунам.
Хүндүлүг доозукчулар! Силер келир амыдыралыңарның оруун шилиир эң-не харыысалгалыг болгаш кончуг чугула шиитпирни хүлээп алыр чадазында тур силер. Бодуңарның келир үеңер, төрээн республикаңарның, улуг чуртуңарның салым-чолу чүгле силерниң шыдамык чорууңардан, күш-ажылга ынааңардан, салым-чаяаныңардан хамааржыр. Бо кайгамчыктыг доозукчу кежээ силерниң бүгү чуртталгаңарга чалыы назынның байырлалы, келир үеже чаа-чаа чедиишкиннер, чырык чараш идегел, бүзүрелдер болуп артар болзун!
Орууңар ак болзун! Аас-кежик, чедиишкиннер үргүлчү доктаап-ла турар болзун! — деп, Тываның Баштыңы башкыларга, доозукчуларга болгаш оларның ада-иелеринге байырын чедирген.
![](https://shyn.ru/media/cache/2024/07/01/nty9w6hoxk4-3dc856c338.jpg)