Тываның Өөредилге яамызы республиканың ниити өөредилге албан черлеринге байырлыг чыскаалдар болгаш доозукчулар кежээлерин эрттиреринге методиктиг тускай сүмелерни белеткээн.
Документиде айыттынган хүннер езугаар 9 класстарның доозукчуларынга аттестаттар тыпсыр чыскаалдар июнь 28-те болур. А 11 класс доозуп турар оолдар, кыстарга доозукчулар кежээлери регионнуң школаларынга июнь 29-та байырлаар.
Уруглар болгаш элээдилерге комендант шагын сагыыры-биле 9-ку класстың аттестат алыр байырлалын кежээкиниң 18.00 шактан орайтавазын, а 11-ги класстың доозукчуларын кежээ 20.00 шакка чедир организастаарын Өөредилге яамызының ажылдап кылган сүмезинде айыткан. Байырлыг шугум чыскаалы эрттирип тургаш, ада-иелерниң хөй-ниити организацияларының, эмчилерниң, полиция ажылдакчыларының айыыл чок чорукка хамаарыштыр берген сүмелерин сагыыры чугула.
Оон ыңай байырлыг чыскаалдың программазын ажылдап кылып тура, РФ-тиң болгаш ТР-ниң Күрүне туктарын күрүнениң ыдык ырыларының үделгези-биле көдүрер езулалды киирер. Хөй ажы-төлдүг азы хөй салгалдарлыг хүндүткелдиг өгбелерни, РФ-тиң болгаш ТР-ниң күрүне шаңналдары алган хамаатыларга сөс бээрин программаже киирер. ТШО-га киришкеш, шаңнал-мактал алганнарны, «эки» демдектерлиг доозукчуларны болгаш оларның ада-иелерин азы хоойлу езугаар төлээлерин байырлыг чыскаалга демдеглеп, оларга хүндүткелди көргүзер.
Ажы-төлге айыыл чок чорукту тургузар дээш, янзы-бүрү патриотчу темаларга класс шактарын организастаар. Тайга-таңдыже, хемнер, хөлдерже коллективтиг үнүүшкүннерни болдурбас. Пиротехниктиг кылыглар, фейерверктер болгаш янзы-бүрү шарлар, фонариктер чазылдырып болбас. Аттестат алган соонда, ада-иелерни харыысалгаже кыйгырып, ажы-төлүн хүлээнген дугайында бижикке хол үжүүн ада-иелерге салдырар.
Банкет залдарынга (хөй-ниити чемненилге черинге, кафе, рестораннар, кежээки клубтарга) кежээни эрттирерин, байырлалда чазылдырар чүүлдер ажыглаарын, республика девискээринде онза байдал чуруму чоруп турарындан база сезон аайы-биле саргы көвүдээнинден, арыг агаарже уругларны дыштандырарын шуут хораан. Оон аңгыда, өөреникчилерниң ада-иелеринден база оларның хоойлу езугаар төлээлеринден акша чыырын, байырлал үезинде арага-дары ижерин шуут болдурбас.
Доозукчуларга концерт көөр залдар азы театр баарын чөпшээреп турар.
11 класстың доозукчуларынга «Азияның төвүнде доозукчуларның бөлүглежии» деп балды эрттирерин чөпшээрээн. Июнь 29-туң хүнүнде 15.00 шактан 17.00 шакка чедир кожуун төптериниң чагырга чериниң, культура одааның баарынга азы стадионнарга, сесерликтерге дээш тус черлерниң хөй кижи чыглыр шөлүнге балды эрттирерин ТР-ниң Өөредилге яамызы сүмелеп тур.
«Венский вальс» деп ырының аялгазынга доозукчунуң вальзын республиканың школаларынга организастаары чугула.
Хемчегни эгелээр мурнунда айыыл чок чоруктуң кичээлин, ада-ие хуралын эрттирип, тайылбырны берип, дежурныйлаарын дугуржур. Доозукчулар байырлалы эртер хөй-ниити шөлүнүң өртке удур айыыл чок чоруун хандырарын, өрт өжүрер херекселдер-биле четчелеттингенин доктаамал хыналдага алыр.
А. ОНДАР белеткээн.
Чурукту интернеттен алган.
«Шын» №46 2024 чылдың июнь 22
