Июнь 28–29-та эртер доозукчулар кежээзинге белеткел дугайында Тываның Чазааның Аппарат хуралынга сайгарып чугаалашкан.
Бо чылын республикада 9 база 11 классты 9,5 муң өөреникчи доозуп турар. Ынчангаш байырлыг кежээлерни эрттирерде, айыыл чок чорукту сагыыры чугула: доозукчу кежээлерниң болур черлериниң каасталгазындан эгелээш, шупту санитар-эпидемиологтуг нормаларны сагыырынга чедир. Ол дугайында Тываның Баштыңы Владислав Ховалыг бодунуң блогунда бижээн:
«Доозукчуларның байырлыг кежээзи ада-иелерге, эрге-чагырганың шупту деңнелинде ажылдакчыларның база доозукчуларның боттарынга харыысалгалыг үе болур. Бо чылын республикада 9 база 11 классты 9,5 муң өөреникчи доозуп турар. Ынчангаш байырлыг кежээлерни эрттирерде, айыыл чок чорукту сагыыры чугула: доозукчу кежээлерниң болур черлериниң каасталгазындан эгелээш, шупту санитар-эпидемиологтуг нормаларны сагыырынга чедир. Эрге-хоойлу органнары-биле тодаргай кады ажылдажылганы тургузуп, дүн-хүн чокка дежурныйларны салыр.
Оон аңгыда, аныяктар аттестаттарны холга алгаш, кайда-даа чок артпас ужурлуг. Бо айтырыгны онзалап демдеглекседим. Байырлыг кежээлерниң үезинде болгаш ооң соонда-даа доозукчулар башкыларның болгаш ада-иениң хайгааралынга турары чугула. Аныяктарның орай кежээ кудумчуга хайгаарал чок артарын болдурбазы-биле, республиканың Өөредилге яамызы ада-ие-биле сырый харылзааны тургузарын даастым».
ТР-ниң Өөредилге яамызының медээзинден.
“Шын” №47 2024 чылдың июнь 26
