Дус биле таакпы кижиден харамнанмас, ынчанмас. Чүге? Чүге дээрге аштап өлген кижиниң хойнунга дус биле таакпы чыткан чүве дээн. Тывалар кижи чок болган черге чүге таакпылажыр чүвел? Чүге дээрге ажыгны ажыг-биле базар дээр. "Силерниң ажыг кажыыдалыңарны үлежип тур мен" дээн уткалыг. Ам бо үеде кижи ажааган черге баарга, чоннуң сунган таакпыларын улуг шил банка иштинде чыып турар. Черже чоруурда ап алыр. Оон дедир-ле чоннуң бодунга үлеп эгелээр.
Шаанда, харын-даа чоокку үеге чедир безин, ындыг эвес турган чүве. Чок болган кижиниң бодунуң таакпызын чонга үлээр ужурлуг. Чок кижиниң өмүнээзинден: «Ооң сөөлгү таакпызы-дыр ийин» – деп, чоок кижилери үлеп турар боор чүве. Чүгле чаңгыстап аан. А ол пакет сумкада уруп каан чоннуң таакпызын чер каскан улуска азы аксын ажыткаш каап каарга, таакпылаар улус алгаш баар.
Кижиге таакпы чок куруг даңза сунмас, ынчанмас. Чүге? Чүге дээрге куруг даңза сунган кижи боду чүү-даа чок ядарап каар дээр. Чүге чок болган кижини «кызыл-дустай берген» дээр чүвел? Чүге дээрге шаанда Өвүрже кызыл-дустап чоруткан кижи дуска бастыргаш, олчаан келбейн барган чүве-дир. Ындыг таварылгалар бо-ла болур турган дээр. Ол чылдагаан-биле чок апарган кижини «кызыл-дустай берген» деп чугаалаар апарган. "Ол ам кажан-даа келбес" дээни ол.
Валентина Моңгуштуң
«Ак баштыгларның алдын үүжези» деп номдан эге.
Чурукту интернеттен хоолгалаан.
“Шын” №35 2005 чылдың сентябрь 11