Бо чайын Дус-Хөлге ТР-ниң Күрүнениң кадык камгалалының бюджеттиг албан чери “Уругларның келдередилге болгаш кадыын быжыктырар төп” 54 олуттуг пансионатты ажыдар. Ол дугайында ТР-ниң Кадык камгалал яамызының сайтызында бижээн.
Үстүнде айтыткан Төпке эмнээшкин болгаш келдередилге эрттип турган уруглар Дус-Хөлге ажыттынар пансионатка халас дыштаныр. Оон аңгыда, эмчиниң сүмези-биле келдередилге эрттиксээн уруглар болгаш оларны эдертип чоруур улустарны хөлге чедир автотранспорт-биле халас чедирер.
2023 чылда Тываның Кадык камгалал яамызы хоочураан аарыглыг 2500 уругнуң кадыын быжыктырар сорулганы салган.
Бир дугаарында, курорт-санаторлуг эмнээшкинни инвалид уруглар, өскүс уруглар болгаш ада-иезиниң хайгааралы чок арткан уруглар база ТШО киржикчилериниң уруглары алыр дугайында яамының сайтызында бижип турар.
Өске хамаатыларга бир оруннуң өртээ 550 рубль. Ону алырда, баш бурунгаар 89232671269, 89232624506 телефоннарже долгааш, бижидип алыр. Төлевирин пансионатка чедип келген хүнүнде чорудуп болурун сагындыраалы.
Пансионатка дыштаныксаан улуска орун-дөжекке херек чүүлдерни бээр. Оон аңгыда изиг-соок суглуг чунар өрээлди, чем кылып чиир өрээлди ажыглап болурун чөпшээреп турар.
ТР-ниң Кадык камгалал яамызының медээзи-биле.
Чуруктарны интернеттен алган.
#Шынсолун#новоститывы #новостикызыл #кызыл #тувамедиагрупп #Тува #Тыва #Tuva #TMG #TMGNEWS #Tuvanews
