«Тываныӊ буянныг чүректери» деп шимчээшкинниӊ идепкейжилери ТШО-нуӊ хоочуну Мерген Кууларга дузалаан.
Дайынчы хѳделиишкиннерниӊ хоочуну база тускай шериг операциязыныӊ киржикчизи Мерген Кууларныӊ ѳг-бүлезинге адрестиг ачы-дузаны чедирбишаан, «Тываныӊ буянныг чүректери» деп шимчээшкинниӊ идепкейжилери боттарыныӊ эп-сеткилин каттыштырып, деткимчезин кѳргүскен. Хоочуннуӊ ѳг-бүлезиниӊ дилээ-биле олар хѳмүр-дашты сарайынче киирип бергеш, ооӊ бажыӊын келир кыжын одаар чүүл-биле хандырган.
Бот-боттарын деткижер, буянныг чорукту үнелеп, ѳѳрүп четтиргениниӊ демдээ кылдыр, хоочуннуӊ ѳг-бүлези оларны шайладып турган.
Деткимче акциязын организастап, ону боттандырарынга Тыва Республиканыӊ Улусчу фронтузу дузалап, транспорт бергени дээш аныяктар шимчээшкининиӊ кежигүннери ѳѳрүп четтиргенин илередип турар.
Деткимче хереглээн улуска дузалажырынга кезээде белен бис дээрзин шимчээшкинниӊ идепкейжилери демдеглээн. «Ачы-буян чедирип, кижилерге, ылаӊгыя Тѳрээн чуртувусту камгалап чораан улуска дузалаары бистиӊ хүлээлгевис-тир».
Айыыл чок черге, амыр-тайбыӊ амыдырап-чурттаарывыс дээш хѳйнү кылган улусту деткиири чугула дээрзин идепкейжи аныяктарныӊ эгелекчи саналы тода кѳргүзүп турар.
«Тываныӊ буянныг чүректери» шимчээшкинниӊ медээлеринден.
“Шын” №87 2024 чылдың ноябрь 13
