Угаадыглыг чугаа
Бир-ле катап Будда Башкыга ады-сураа бүгү чуртка алдаржаан эртемден кижи айтырыглыг келген чүве-дир. Будда аңаа ол дораан харыылавайн, элээн болгаш чедип кээрин дилээн. Ол кижи хомудай бергеш, айтырган:
— Мээң айтырыымга ам харыылаарынга чүү шаптыктап турар ирги? Ам чайлыг ышкажыл силер азы меңээ бичии-даа бо үеңер бээр хөңнүңер чок-тур бе?
— Үем бар. Ынчалза-даа сен ам мээң харыымны хүлээп алырынга белен эвес-тир сен — деп, Будда аңаа харыылаан.
— Чүге? — деп, эртемден кайгай берген.
Будда аңаа мындыг тайылбыр берген:
— Кижилер саваларга дөмей. Бирээзин доңгайтыр салып каан, чеже-даа суг кудар болза, ол долбас. Ынчангаш ол кижи сээң харыыңга хааглыг болгаш ону хүлээп көрбес. Ийиги сава — адаанда дежик. Суг кударыңга, долуп турар ышкаш боор, ынчалза-даа ол дораан куруг апаар. Чеже-даа кударыңга, ол кажан-даа долбас — чүү-даа аңаа туттунмас. Үшкүлери бок-сак долган саваларга дөмей. Шын тургузуп каан, адаанда дежик эвес, ынчангаш сугну кударга, аңаа артып каар. Ынчалза-даа бок-сактыг боорга, суг аңаа кажан-даа арыг болбас. Ам сен база ындыг, бок-сак долган сава дег-дир сен. Дыка-ла хөйнү билир-дир сен, ынчалза-даа хөй кезиин медереп билип албаан-дыр сен. Ынчангаш амдыызында сээң айтырыыңга харыылаары утка чок-тур. Соонда кел.
Л.С. МИЖИТ очулдурган.
«Сарыг шажынның угаадыглыг чугаалары» деп номдан алган.
Чурукту интернеттен хоолгалаан.
“Шын” №22 2025 чылдың июнь 12