Бо хүннерде республикада түр үениң бүгү дыштанылга төптериниң ийиги сезону эгелээн. Чайгы кампания эгелээрге, республиканың культура албан черлериниң баазазынга 121 дыштанылга төптери ажылдап эгелээн. Бирги сезон июнь 20-де доозулган. Ийиги сезон июль 25-ке чедир уламчылаар, а үшкүзү август 1-ден 25-ке чедир ажылдаар.
Июль айның бир дугаар неделязында дыштанылга төптеринге байырлыг ажыдыышкыннар болур. Ында хүн бүрүде янзы-бүрү хемчеглерни планнаан. Уругларны болгаш элээдилерни долу программа манап турар: чогаадыкчы мөөрейлер, викториналар, мастер-класстар, хөглүг старттар, спортчу маргылдаалар, экскурсиялар, ынак мультфильмнер болгаш тоолдар көрүлдези, орук шимчээшкининиң дүрүмнериниң дугайында оюн хевирлиг тайылбырлап тургаш, билиглиг болгаш профилактиктиг кичээлдер, хоралыг чаңчылдар дугайында беседалар.
Бичии уругларга болгаш элээдилерге түр үениң дыштанылга төптерин Культура бажыңнарының болгаш төптериниң баазазында ажыткан.
ТР-ниң Культура яамызының медээзинден.
“Шын” №49 2024 чылдың июль 3
