Март 4-те Россияның юстиция сайыды Тывага ажыл-агыйжы сургакчылаашкынны кылган.
ТР-ниң Баштыңы Владислав Ховалыг-биле кады элээн айтырыгларны сайгарып чугаалашкан. Оларның аразында Россияның Кеземче күүселдезиниң федералдыг албанының Тыва Республикада эргелелинге хамааржыр объектилерниң оран-савазын эде көжүреринге хамаарышкан айтырыг.
Шак ындыг төптерде хоругдаттырганнар кылган ажылы-биле акшаны ажылдап ап, ниитилелге ажык-дузазын көргүзүп турарын барымдаалап, оларның турар черлерин сайзырадыры чугулазын чугаалашкан.
Оон аңгыда, найысылалда эрткен чылдың май айдан тура ажылдап эгелээн күрүнениң юридиктиг халас дуза чедирер бюроларынга база четкен. Ол бюроларның көргүзүглери Россияда тергиин деп санадып турарларның аразынче киргенин Константин Чуйченко дыңнаткан. 2023 чылдың дургузунда ук бюролар чондан 4000 ажыг билдириишкиннерни хүлээп ажылдаан болуп турар. Тывага шак ындыг бюроларны ам-даа сайзырадып, халас дуза чедирилгезиниң системазын экижидерин федерадыг сайыт сүмелээн.
Ол-ла хүн Константин Чуйченко Россияның Кеземче күүселдезиниң федералдыг албанының Тыва Республикада эргелелиниң удуртукчузу-биле истелге изолятору болгаш эдип-чазаар колонияны көжүрер черни барып көргеш, деткээн.
«Бо объектиниң алыс утказы, чаңгыс черге кеземче-күүселде системазының бүгү хевирлерин: истелге изоляторун, хосталгазын казыттырып шииттирген кеземче күүселдезинде орарларның оран-савазы болгаш хоругдаттырганнарны эдип-чазаар черни, оларның эргелерин камгалаар болчукчулар төвүн чаңгыс аайлаарынче угланган. Мен бодаарымга, амгы үеге дүүшкен боорда, шын объект болур” – деп, Россияның юстиция сайыды чугаалаан.
Ол ышкаш шак ындыг объектиниң боттанылгазын Калуга облазында эгелей бергенин, аңаа дөмей төлевилелдерни Кемеровода, Казаньда боттандырып эгелээнин дыңнаткан. “Улуг Новгородта юстиция бажыңын тудар черде дашты салдывыс. Планывыста чамдык регионнарга, ооң иштинде Кызылга, ындыг объектилерни тударын киирген бис. Бөгүн Тывага чаңгыс аайлаан улуг төптү шак-ла ынчаар тудуп кылырының аргазын чугаалаштывыс”– деп, Константин Чуйченко дыңнаткан.
Бодунуң ээлчээнде Чазак Баштыңы Владислав Ховалыг 1 дугаарлыг эдип-чазаар колонияның оран-савазын көжүрер дугайында план шагда-ла ажылдаттынганын таныштырган.
“Тываның Чазаа Россияның Юстиция яамызы-биле федералдыг программа езугаар 2025 чылда тудар объектилерниң төлевилелдерин чугаалажып көөр, оон чоорту 2028 чылда тудугну эгелээр деп дугуржулганы кылдывыс. Аңаа тааржыр девискээрни Кызыл кожууннуң Сукпак суурунуң чанында тодарадып каан. Константин Анатольевичиниң сүмелээни-биле, Россияның Кеземче күүселдезиниң федералдыг албанының Тыва Республикада эргелелинге хамааржыр объектилерни автоорук чоогунче тудар болган. Ынчалза-даа тудуг чорударынга, электри четкизин шөеринге, моон соңгаар оларның ажыл-ижинге-даа, хоругдаттырганнарның дөргүл-төрели оларга ужуражып кээринге-даа эптиг болур”– деп, Владислав Ховалыг чугаалаан.
Россияның юстиция сайыды ол хүн РФ-тиң Тыва Республикада Юстиция яамызының эргелелиниң болгаш Федералдыг суд приставтарының Тывада эргелелиниң Кызыл хоорайда албанының ажылдакчылары-биле ужурашкаш, оларның нарын айтырыглары болгаш келир үеде кылып чорудар ажыл планнарының дугайында чугаалашкан.
Чазак Баштыңы бодунуң блогунга “Кызылдың девискээринден истелге, кеземче күүселде албан черлериниң оран-савазын өскээр көжүрер дээн бистиң саналывысты деткээни дээш Константин Анатольевичиге четтирдим. Найысылалдың төвүнде турар бо черлерни хостаптар болза, аңаа хоорай тудуун сайзырадырынга эптиг девискээр болур” – деп, ол бижээн.
Россияның юстиция сайыды-биле Тываның Баштыңы Владислав Ховалыг бо чылдың январь төнчүзүнде Москвага ажыл-агыйжы сургакчылаашкын үезинде ужурашканын сагындыраал. Ынчан ийи таланың база бир кол чугаалашкан айтырыгларының бирээзи, истелге изолятору биле 1 дугаарлыг эдип-чазаар колонияны найысылалдың төвүнден ырадыр көжүрер дугайында болган. Шагдан тура көдүрлүп келген чидиг айтырыгны тодаргай өөренип көөрү-биле, Константин Чуйченко бистиң республикага кээрин ынчан-на шиитпирлээн турган. Федералдыг сайыт аазаанын дораан күүсеткен.
К. МОНГУШ.
Ада ТЮЛЮШТУҢ тырттырган чуруктары.
