Декабрь 11-де “Ада-чурт камгалакчылары” күрүне фондузунуң Тывада салбырынга ТШО-да Тывадан барган дайынчыларга ээлчеглиг ачы-дуза чедирилгезин Тес-Хем кожууннуң хууда сайгарлыкчызы Аян Сырат кылган. Ол Кызылда автосалондан 1 сая 50 муң рубль өртектиг көңгүс чаа “Нива” марканың машиназын садып алгаш, Улусчу фронтунуң Тыва Республикада регионалдыг исполкомунуң удуртукчузу Саима Далчинге хүлээдип берген.
“Бөгүн ээлчеглиг база бир автомашинаны хууда сайгарлыкчы биске хүлээдип берди. Ол ТШО-да Тес-Хем кожуундан барган чаңгыс чер чурттуглары дайынчы оолдарның чагыын күүсеткен болуп турар. Бо хууда сайгарлыкчының мынчаар чер чурттугларын деткип, ак сеткилдии-биле дуза кадып турары, өөрүнчүг-дүр. Шак мындыг бедик, берге оруктарга тура дүшпес “Нива”, “УАЗ” маркалыг автомашиналар ТШО-да дыка херек болуп турар. Компания “РЖД» партнёрувустуң дузазы-биле чыглы берген автомашиналарны декабрь айда чедер черинге чедир халас чедирип бээр аргалыг бис” — деп, Саима Далчин чугаалаан.
Тес-Хем чурттуг сайгарлыкчының чугаазы-биле, ТШО-да 25 кижи киржип турар. Ынчангаш оларга дуза кадары дээрге ооң дорт хүлээлгези деп ол чугаалаан:
— Эрткен чылын база бир автомашина ГАЗель “Баргузин” болгаш рация, туран, чылыг идик-хепти база чорудуп турган бис. Ам бо удаада чаа автомашинаны ында дайылдажып турар чаңгыс чер чурттугларымның чагыын күүседип, чорудуп турарым бо.
Амгы үеде орук тудуунга хамааржыр ажылдарны кылып турар мен. Бо чылын 5 объектини дужаадывыс. Чыл төнмээнде, Чаа чыл уткуштур дүгде оолдарга дуза болзун дээш, бо машинаны берип турарым бо.
Карина МОНГУШ.
Ада ТЮЛЮШТУҢ тырттырган чуруктары
“Шын” №95 2023 чылдың декабрь 13
