Улуг-Хем кожууннуң шаңналы дээш чаңчыл болган ээлчеглиг ай хүрежи "Сүбедей" спорт ордузунга октябрь 19-та болган. 57 ат чок база 48 шыырак мөге аразынга тыва хүреш бедик деңнелге болуп эрткен.
Улуг-Хем кожуун чагырыкчызы Радж Баз-оол база республиканың Арзылаң мөгези Радик Наважап мөгелерге байыр чедирген соонда, кол шииткекчи Начын мөге Эдуард Самбуу биле чарлакчы Эрес Санчы 57 ат чок мөгениң хүрежиниң баштайгы салыгларын эгелей бергеннер. Дуржулгалыг мөге салыкчылары Начын мөге Субудай Шойдуннуң удуртулгазы-биле шалыпкын ажылын көргүскеннер.
Маргылдаа үезинде Арзылаң мөге Радик Наважап ай хүрежиниң төөгүзүн меңээ кысказы-биле таныштырды: “Республиканың Күш-культура болгаш спорт агентилелиниң даргазы тургаш, “Автомобилист” спорт залынга 2011 чылдың январь айда, Сүт-Хөл кожууннуң удуртулгазы-биле демнежип бир дугаар ай хүрежин эгелээнивистен бээр, 2025 чылдың январь айда, 15 чыл оюн демдеглээр бис. Бир дугаар маргылдаага амгы үеде Олимп аттыг олимпийжи курлавырлар спорт школазының директору Владимир Түлүш база тренерлери Айдаш Самдан, Арзылаң мөгелер Геннадий Монгуш, Андрей Хертек база чарлакчы мөге Айдыс Куулар болгаш оон-даа өскелерниң киржилгези-биле бедик деңнелге эртип, улаштыр сайзыраар улуг деткимчени Тыва Чазактың база Дээди Хуралдың мурнундан алган. Түңнелинде, бо хүнде аныяк мөгелеривис бүгү Моолдуң 18 хар чедир командалар аразында хүрежинге төрээн республиказын алдаржыдып, 3 дугаар шаңналдыг черни алганы улуг чоргаарал, алдар.
Ай хүрежиниң түңнелинде ат чок мөгелер аразынга Юлиан Товуу (Улуг-Хем) шүүлген, Хүрегечи-Мерген Сундуй-оол (Улуг-Хем) үжүүрлешкен; 3–4-кү черлерде Хүлер Түлүш (Улуг-Хем), Сайын Балдан (Улуг-Хем) база сес шыырак мɵге аразынче Менги Монгуш (Чөөн-Хемчик), Айдыс Монгуш (Өвүр), Онзагай Ооржак (Сүт-Хөл), Буянды Болат (Бай-Тайга) киргеннер.
Улуг ат-алдарлыг мөгелер аразынга кончуг шыырак онагларын Арзылаң мөге Мөңге-Эртине Кууларны, Хартыга мөге Начын-Мерген Ооржакты октааш, Тываның Начын мөгези Юрий Кызыл-оол дидим, шалыпкын, чараш хүрежи-биле шүглүп үнген. Үжүүрүнде Хартыга мөге Начын-Мерген Куулар (Сүт-Хөл), 3–4-кү черлерни Арзылаң мөге Мөңге-Эртине Куулар (Чөөн-Хемчик), Начын мөге Эртине Хомушку (Мөңгүн-Тайга), 5–8-ки черлерде Аңчы Ооржак база Түметей Ширижик (Сүт-Хөл), Хүлер Түлүш (Улуг-Хем) база 50 харлыг хоочун мөге Орлан Монгуш (Чөөн-Хемчик) киргеннер.
Тиилекчи мөгелер медальдар, дипломнар, доктааткан 25–15–10–5 муң акша шаңналдарын алганнар.
А.ЧАМБАЛ-ООЛ.
Чурукту интернет четкизинден алган.
“Шын” №81 2024 чылдың октябрь 23
