Наадым бүдүүзүнде Тывадан тускай шериг операциязының зоназынче ээлчеглиг автоколоннаны чоруткан. Бо удаа республиканың аңгы-аңгы албан черлери 4 автомобильди Улусчу фронтунуң штавынга дамчыткан.
ТР-ниң Дээди Хуралының (парламентиниң) депутады Эрес Хуурактың чугаазы-биле алырга, автомашиналарны демир-орук-биле чедирер.
«Автопоездини тургускан схема езугаар чорудар бис: баштай Абаканга чедирер, оон бистиң партнёрувус — РЖД-ниң (Россияның демир-оруктары) киржилгези-биле Донда Ростовка чедирер, дайынчыларывыс автомобильдерни оон ап алырлар. Мурнундагы машиналар партиязын шагда-ла чорудупкан бис» — деп, Эрес Хуурак дыңнаткан.
Дөрт машинаны аңгы-аңгы албан черлери дамчыткан: «Россияның телевизионнуг болгаш радио дамчыдылга четкизи» федералдыг күрүнениң унитарлыг бүдүрүлгеден чүък чүдүрер "ГАЗ-66", Тыва Республика талазы-биле Россияның федералдыг үндүрүг албанындан "Ford Focus" чиик автомобиль, ТР-ниң Дээди Хуралындан «ГАЗель» база "УАЗ Хантер" хуу автомобиль.
«Россияның телевизионнуг болгаш радио дамчыдылга четкизи» федералдыг күрүнениң унитарлыг бүдүрүлгениң салбырының төлээзи Петр Ширконуң дыңнадып турары-биле алырга, "ГАЗ-66" автомобильди республиканың чурттакчызынга даглыг черге, берге байдалдарга ук техниканы ажыглаар кылдыр чорудуп турар. Чүък машиназын оон-даа эптиг кылдыр кунг (дуглаглыг кузов-фургоннуң бир хевири) болгаш автономнуг агрегат-биле дерээн.
Үндүрүг албанының ажылдакчылары ТШО-да шериглерге деткимче көргүзерин уламчылап турар деп, Тыва Республика талазы-биле Россияның федералдыг үндүрүг албанының удуртукчузунуң оралакчызы Чингис Ооржак чугаалаан. Олар «Ford Focus» деп чиик машина шериглерге ажылдаарынга эптиг болгаш ажыктыг болур дээрзинге бүзүреп турарлар.
«Шупту чүүлдү Тиилелгеже!» деп Улусчу фронтунуң федералдыг төлевилели биле ТШО-нуң хереглелинге ниитизи-биле Тывадан 150 машинаны чоруткан.
А. СОЯН белеткээн.
Буян ООРЖАКТЫҢ тырттырган чуруктары.
"Шын" №54 2024 чылдың июль 20
![](https://shyn.ru/media/cache/2024/07/21/0mwha0su-iq-8bce8f05bd.jpg)
![](https://shyn.ru/media/cache/2024/07/21/ebr6ouegnc-36ae7cdbeb.jpg)
![](https://shyn.ru/media/cache/2024/07/21/ffukmcpbqkg-2d5dc7480b.jpg)
![](https://shyn.ru/media/cache/2024/07/21/e6vcws-sfq-fdaf67be79.jpg)
![](https://shyn.ru/media/cache/2024/07/21/2f-x29jkak-c2e4c5cc5f.jpg)
![](https://shyn.ru/media/cache/2024/07/21/ss-qrgrgrfw-96db680e18.jpg)
![](https://shyn.ru/media/cache/2024/07/21/yqk-qp8ikoi-404b3a63ff.jpg)