Республикадан ээлчеглиг дузаламчыны ниити-россияның Улусчу фронтузу «Шупту чүүлдү Тиилелгеже!» деп акцияның иштинге организастаан.
Республиканың Баштыңының, Дээди Хуралдың, Улучу фронтунуң регионалдыг салбырының, күрүне организацияларының, сайгарлыкчыларның болгаш чурттакчыларның деткимчези-биле ТШО-нуң девискээринче июль 25-те ийи автомобильди, элээн каш мотоциклдерни, бир квадроциклди, аъш-чем аймаан, тускай техниктиг херекселдерни, эм-таңны болгаш өске-даа чүүлдерни чоруткан. “Деткимче” фондунуң регионалдыг салбыры кывар-чаар чүүлдүг фура-биле хандырган.
— Республиканың Баштыңы Владислав Ховалыгның даалгазы-биле бөгүн тускай шериг операциязында киржип турар бистиң дайынчыларывыска, а ол ышкаш Луганск Улус Республиканың бистиң шефке алганывыс Свердловск хоорайның тайбың чурттакчыларынга ээлчеглиг гуманитарлыг чүъктү чорудуп тур бис – деп, “Деткимче” («Содействие») фондунуң директору Артыш Иргит чугаалаан. Шериг албанныгларның хереглелинге чорудуп турар автомашиналарның бирээзин, УАЗ-Патриотту, Күрхайгааралдың Тыва Республикада Енисей эргелелиниң ажылдакчылары берген.
– Күрхайгааралдың Енисей эргелелиниң Кызыл хоорайда девискээр эргелели Улусчу фронтуга УАЗ-Патриот автомобильди ТШО девискээринге дамчыдары-биле хүлээдип берген. Ук машинаны эдилеп кааны эки, техниктиг көрүлделерни үе-шаанда эртип турган болгаш эки байдалдыг автомобильди дамчыдып берип тур бис – деп, Енисей эргелелиниң удуртукчузу Наталья Бурдюкова чугаалаан.
— Ам 20 тоннаның фуразын чүдүрүп тур бис, ол бөгүн-не аъттаныптар. Мооң мурнунда поезд-биле 15 машинаны чоруткан бис, бөгүн база ийини. Шериглерге чедирер шупту автомобильдер болгаш гуманитарлыг дуза Донда Ростов хоорайга хары угда чедер, оон Луганск Улус Республиканың Свердловск хоорайже углаптар. Дузаламчыны чүгле шериглерге эвес, а хостаткан девискээрлерниң тайбың чурттакчыларынга чедирер» — деп, ТР-ниң Дээди Хуралының депутады, Тывада Улусчу фронтунуң эксперти Эрес Хуурак медеглеп, дайынчыларны деткиир херекке үлүүн киирип чоруурларга четтиргенин илергейлээн.
А. ХЕРТЕК белеткээн.
"Шын" №56 2024 чылдың июль 27
