ТР-ниң Баштыңының даалгазы-биле март 21-де Тывадан тускай шериг операциязында киржип турар чаңгыс чер чурттугларывысче ийи автомашинаны, үш мотоциклди, хол-биле даарап кылган четкилерни аъткарыпкан. Москвадан бир автомашинаны немей садар.
Оон аңгыда, гуманитарлыг чүъкте Луганск облазының Свердловск хоорайның чурттакчы чонунга чедирери-биле аъш-чем аймаан база чүдүрген. Тус черниң бүдүрүп турары продукция Россияның чаа регионнарынга билдингир болзун дээш, тус черге бүдүрген аъш-чем аймаан чорудуп эгелээн. Ук хемчегни эрткен чылдан эгелээш организастап эгелээн дээрзин сагындыраал.
ТР-ниң Чазак Даргазы Владислав Ховалыгның оралакчызы Тимур Куулар болгаш ТР-ниң Дээди Хуралының депутады Эрес Хуурак олар гуманитарлыг чүъктү үдеп чоруур. Эрес Хуурактың чугаазы-биле алырга, автомашиналарны республиканың дүрген дуза чедирер болгаш медицина катастрофа төвү база Тываның прокуратуразы чоруткан. Эм-дом чүдүрген УАЗ маркалыг автомашина болгаш УАЗ «Патриотту» чоруткан.
Оон аңгыда, Свердловск хоорайның Культура одаанга дузаламчы кылдыр ТР-ниң Культура яамызы 1,5 сая рубльга үн дериг-херекселин чүдүрген.
«Содействие» регионалдыг фондунуң директору Артыш Иргиттиң демдеглээни-биле алырга, гуманитарлыг чүъкте ТШО-да дайынчыларынга дизельдиг генераторлар, квадрокоптерлер дээн ышкаш тускай техникаларны база суп каан.
Свердловск хоорайның чурттакчыларының чагыын езугаар суксун, суг, тушёнка дээн ышкаш аъш-чем аймаан чоруткан. 1,5 муң банка тушёнканы бо удаада аъткарганы ол.
«Вавиол» КХН база ол хүн Свердловск хоорайже бодунуң бүдүрген суксуннарын, ижер сугну чоруткан. Олар дараазында чүъкте ары чигирин болгаш янзы-бүрү кат-чимистен кылган сироптарны чорудар деп планнап турар.
Самба НОРБУЖУК.
Буян ООРЖАКТЫҢ тырттырган чуруктары
«Шын» №37 2024 чылдың май 22
![](https://sun9-33.userapi.com/impg/RtLEd0lBgax8884Ll798oWS2H9T4NCLVVmcdyw/Yq6cB1xJvXM.jpg?size=604x420&quality=95&sign=9edb4e571da4bc3067b1ebc5cf05ca43&c_uniq_tag=bvRuzA7qTDTwu--Y0tnmoaiWwE11MHeGUuWKlTvl5pw&type=album)
![](https://shyn.ru/media/cache/2024/05/22/rfyhwowrvi0-0451a2ef80.jpg)
![](https://shyn.ru/media/cache/2024/05/22/phkbgvkid-g-ffbbb58277.jpg)