Росгвардияның Тыва Республикада эргелелиниң дайынчызы ефрейтор Айдыс Тогаа Чөөн Сибирьниң эң бедик даа — Мөңгүн-Тайганың шыпшыынче үнгеш келген.
Кандыг-даа бедиктерже тускай белеткел чок кижи үнүп шыдавас, ылаңгыя меңги доштуг бедик дагже үнери айыылдыг дээрзин шупту билир. Ынчангаш ийи неделя дургузунда дуржулгалыг альпинистер болгаш инструкторларның удуртулгазы-биле Айдыс шыңгыы белеткелди эрткеш, чүгле ынчан даг кырынче үнүп болур чөпшээрелди алган.
Ыдыктыг Мөңгүн-Тайгаже үнер бетинде ол бөлүк альпинистер-биле кады тыва чоннуң шаг-шаандан тура сагып чорууру “Саң салыр” ёзулалды кылгаш, тайга-таңды ээлеринге чалбарып, “чөпшээрелин” дилеп алгаш, шимчепкеннер.
Бир дугаар мындыг бедикче үнүп турар кижиге ук кожууннуң кадыг-дошкун агаарынга чаңчыгары, өөредиглиг кичээл болган. Ол меңги кырынга тайбас дээш канчаар оваарымчалыг кылаштаарын, альпинистиң дериг-херекселин шын ажыглаарын херек кырында көрген.
“Тываның эң бедик шыпшыынче үнген болза деп, шагда-ла бодап чораан мен. Ам ол күзелим бүткенинге өөрүп, хууда чедиишкиннеримге база бир кадарны немеп болур-дур мен. Ол хире бедикче үнүп келгеш, төрээн Тывамның болгаш Росгвардияның туктарын киискидиптерге, сагыш-сеткилге дыка-ла хөлзээзинниг, кайгамчыктыг болду” – деп, ефрейтор Айдыс Тогаа үнүүшкүн соонда чугаалаан.
Медээни болгаш чурукту Туваонлайн сайтызындан алган.