Ада-чурт камгалакчызының хүнүнге тураскааткан “Эрес-дидим чорук” кичээлдери республиканың бүгү өөредилге албан черлеринде эртип турар. Чаңчыл ёзугаар шак ындыг класс шактары уругларның патриотчу кижизидилгезинге салдарлыг болурундан аңгыда, төрээн чурт дээш амы-тынын харам чокка берип чораан дайынчыларның маадырлыг чоруунуң дугайында шынныг барымдааларны билип алырынга дузалыг.
Барыын-Хемчик кожууннуң полиция ажылдакчылары уруглар садтары болгаш школаларда ажык кичээлдерде киржип, ужуражылгаларны эрттирип турар. Ак-Довурак хоорайның “Малышок” уруглар садынга Россияның ИХЯ-ның муниципалдар аразының “Барыын-Хемчик” дежурный кезээниң оперативтиг дежурныйның дузалакчызы, ТШО киржикчизи Айдаш Күжүгет чаладып, төрээн чурт камгалаары эр кижи бүрүзүнүң ыдыктыг хүлээлгези, эр кижи бүрүзү эрес-дидим болур деп чаштарга тайылбырлап берген.
Шак ол патриотчу угланыышкынныг хемчег-биле уруглар садының башкылары эрткен чылын чарлаттынган Өг-бүле чылын хаап, чаа үнүп келген чылда Ада-чурт камгалакчызының чылын байырлыг байдалга ажыткан.
Россияның болгаш Тываның ыдык ырызындан эгелээн хемчегге чалаттырган аалчылар, ада-иелер, башкыларының мурнунга уруглар садының чаштары ырлап, самнап, патриотчу шүлүктерни чыккыладыр бадырып, байырланчыг шинчи киирген.
Солун ужуражылга соонда иштики херектер органнарының ажылдакчызы, ТШО киржикчизи Айдаш Күжүгет чыылганнарга тайбың дээрни, чаштарга кадык өзерин, ада-иезиниң кежээ, дыңнангыр дузалакчылары болурун күзээн.
База бир “Эрес-дидим чорук” кичээли Барлык суурга болган. Аңаа ИХЯ-ның муниципалдар аразының “Барыын-Хемчик” килдизиниң участок шагдаазы полицияның лейтенантызы Сыдым-оол Монгуш өөреникчилер-биле ужуражылганы кылган.
Полицияның ажылдакчызы назы четпээн уруглар-оолдарның мөзү-шынар кижизидилгезинче кичээнгейни угландырып, корум-чурум үрээшкиннерин болдурбазының дугайында профилактика ажылын болгаш хоойлу-дүрүм талазы-биле билиглерин быжыктырган.
Полиция ажылдакчызы амыдыралда херек кырында болуп турар чижектерни киирип, кем-херек үүлгедиишкиннеринден чайлап чоруурун тайылбырлап, хоойлуга удур дүрүм хажытпазын чагаан. Чүге дээрге хоойлу мурнунга шыңгыы харыысалганы онаар дээрзин сагындырган.
Полицияның лейтенантызы школачыларга бот-боттарынга камныг болурун чагаан. Ол ышкаш интернетте социал четкилер таварыштыр танывазы улус-биле харылзаа тутпазын, кевин-херек чок чүүлдерни бодунуң социал четкилерде арнынче үлешпезин, чоннар аразында чөрүлдээлиг чүүлдер дугайында материалдарны деткип, “чүректер” баспазын дыңнаткан.
Медээни болгаш чуруктарны ИХЯ-ның сайтызындан алган.
«Шын» №7 2025 чылдың февраль 27
