Тываның энергия хандырылгазының талазы-биле Комплекстиг планының боттанылгазының канчаар чоруп турарының дугайында Россияның Чазаанга сайгарып чугаалашкан. РФ-тиң Чазааның Даргазының оралакчызы Валентин Новактың удуртулгазы-биле болган хуралга ол төлевилелде киржилгелиг бүгү кижилер чыглып киришкен: республика, хамаарылгалыг албан черлериниң төлээлери, инвесторлар, Россети.
Болган хурал дугайында Тываның Баштыңы Владислав Ховалыг социал четкилерде арнынга бижээн.
“Александр Валентиновичиге четтиргеним илередир-дир мен. Ооң деңнелинге ажылдың канчаар чоруп турарын удаа-дараа шүүштүрер арга берип турары дээш.
Амгы үеде Комплекстиг план ёзугаар Тывада Туран-Туманная деп электри шугуму туттунуп турар. Ооң узуну – 300 километр. Өске хемчеглерниң документилери экспертизаны эртип турар. Инфраструктура объектилериниң төлевилелдеринге хамаарыштыр биске эки түңнелдерни берип тур.
Тываның энергия хандырылгазының Комплекстиг планынга инвесторлар сонуургалдыг – ооң боттанылгазынга казымал байлак чыдымы бар Ак-Сугда, Кара-Белдирде болгаш Кызыл-Таштыгда бүдүрүлгелер холбаалыг. Ындыг-даа болза бис кымдан артык сонуургалдыг бис.
Бо планны амыдыралга боттандырып киириптер болза, регионувусче 2,5 катап, азы 400 МВт-ге чедир күштүг электроэнергияны киириптер арга тургустунар. Ол байдал мөөңү-биле чурттаар оран-сава тудуун шуудадырынга дыка улуг дузалыг болур.
Ниитизи-биле планның боттанылгазы Тываның социал-экономиктиг хөгжүлдезинге улуг салдарны чедирер.
Баш бурунгаар санаашкыннар-биле, 2030 чылга чедир регионче 250 млрд рубльдан хөй инвестициялар хаара туттунган болур, 10 муң ажыг ажылчы олуттар тургустунар. Үлетпүр бүдүрүлгезин 73 млрд рубльга улгаттырар бис, ол ышкаш республика бюджединче немей 36,5 млрд рубль кирер".
Бистиң корр.
Чуруктарны интернеттен алган.
