Экии, хүндүлүг эмчилеривис!

Экии, хүндүлүг эмчилеривис!

Адашкылар Күжүгеттерге улуг назылыгларга дыка эки оран-саваны ажытканынга өөрүп четтиргенивисти илередип олур бис!

Бо берге үеде бис, кырганнар, баар-кирер чер чок, кудумчуга ужуражып, эки-багывысты чугаалажып, медээлеривис-биле солчуп турган болгай бис. Ам амыраан-дыр бис.

Чамдык күрүнелерде кырганнар тускай улуг залдыг, аңгы-аңгы чурттаар өрээлдерлиг, оларга көрдүнген оран-савалыг болуп турарын номчааш, адааргап чугаалажып турган бис.

Бистиң хоорайывыста улуг назылыгларга оран-сава ажыттынганы эки-дир, чүгле түр үеде чурттаар улусту хүлээр дээн деп билип турар бис. Азы кандыг чүве ирги? Бир эвес доктаамал чурттаар улусту база хүлээп эгелээр болза, дыка-ла эки ийик. Ындыг-даа болза дыштаныр, чемненир черлиг болган дээш четтирдивис!

Ам биске билдинмес чүүлдер:

1. Турар адрези, кудумчунуң ады, бажың дугаары, чүү деп автобус доктаамынга дүжер, кандыг ГАЗельдерге олурар?

2. Бир хүннүң төлээр акшазы – 500 рубльди ап алгаш баар бе?

3. Айда 20 муң рубль болза, пенсиявыс арай-ла чедишпес-тир.

Харыызын “Шын”,”Информ” солуннарга салып бээрин улуу-биле диледивис. “Информ” солунну кайда-даа садып турар, а “Шынны” чүгле төпте садып турар.

Бөлүк пенсионерлерден.

Хоочуннарның чагаазынга салбырның эргелекчизи А.С. Ооржактың харыызы:

Адрези: Кызыл хоорайның Шетинкин-Кравченко кудумчузунда 64 дугаарлыг бажың. “Гагарин” автобус доктаамын таварып турар ГАЗельдерге олурар. Кеш аарыглар эмнээр эмнелгениң девискээринче чоокшулай бергеш, хем талазынче кылаштай бээрге, улуг баннер азып каан херим иштинче кирип кээр. Харылзажыр телефоннар: 2-00-21, 8-901-018-68-59.

Күрүнеден хандырылга албайн, бот идепкей-биле ажылдап, чарыгдалдарны хууда боттандырып турарывысты чонувуска катап база чугаалаксаар-дыр бис. Ынчангаш бир хүнде төлээр акшазын ап алгаш келир.

Бир айда 20 муң рубль дээрге, бо хүнде шак ындыг социал ачы-дуза чедирип турар черлер-биле деңнээр болза, эң-не эвээжи болуп турар. Ынаар бүгү чарыгдалдарны санап киирген.

Бо дугайында медээни “Информ” солунга база бээр бис.

/ К. МОНГУШ белеткээн.