Ажыглалдан үнген эрги дугуйларның кайда-даа бок апарган чыдарын шупту билир бис. Чечек тарыыр чалчыгаштар, уруглар ойнаар шөлчүгештерге янзы-бүрү аң-мең дүрзүзү кылырынга харын оларны ажыглаар апарган.
2020–2024 чылдарда «ТР-ниң социал-экономиктиг хөгжүлдези» программаны боттандырар дээш, регионнуң хөгжүлде фондузу биле «Восток» КХН кады «Эрги чиг эттен брусчугаштар болгаш резинден шывыг бүдүрери» деп чаа төлевилелди эгелээн. Ук бүдүрүлгениң кол сорулгазы – эрги резин дугуйлардан чадыглар бүдүрүп, экономикага-даа, экологияга ажыктыг чүүлдү кылыры.
2023 чылда 792 дөрбелчин метр чадыгны бүдүреринге 15 хамаатыны ажылга хаара тудары планда көрдүнген.
Уруглар садтарының, школаларның, спортчу школаларның, стадионнарның, сесерликтерниң дээш дыка хөй социал объектилерниң болгаш чамдык чуртталга бажыңнарының девискээрлерин чаагайжыдарынга эрги дугуйлардан кылган материалды ажыглаар.
Айдың ОНДАР белеткээн.
"Шын" №56, 2023 чылдың июль 29