Айыылдыг болуушкун
Бии-Хем кожууннуң Аржаан суурнуң чоогунда Ак-Хөл деп черде малчын төрелдериниң чайлаанга Кызыл хоорай чурттуг 17 харлыг оол аалдап келген. Июль 28-тиң хүнүнде ол оол таныыры 13 харлыг оол-биле аътка ушкажып алгаш чорааш, электри шугумунуң черден 1 метр хире бедик ток дамчыыр сывырындак демирлеринге таварышкаш, айыыл-халапка таварышканнар. Оолдарның мунуп алгаш чораан аъды ол-ла дораан өлген, 17 харлыг оол күштүг электри тогундан барык бүгү мага-боду өрттенген. 13 харлыг оолдуң база эът-кежи өрттенген.
Токтан өрттенген 17 харлыг оолду баштай Бии-Хем кожууннуң төп эмнелгезинге, оон Республиканың 1 дугаар эмнелгезиниң өртеңнер эмнээр салбырынга эккелгеш, ооң амы-тынын камгалап арттырар талазы-биле хемчеглерни эмчилер дарый ап чоруткан. Оолдуң барык бүгү мага-боду токтан өрттенген болгаш, ооң байдалы дыка берге боорга, ону дүрген дузаның санитар авиациязының самолёду-биле Красноярск хоорайда клиниктиг эмнелгениң реанимация болгаш интенсивтиг терапия салбырынга аппарып чыттырган. Оолдуң амы-тынын камгалаар талазы-биле хемчеглерни клиниктиг эмнелгениң эмчилери ап чорудуп турар.
13 харлыг оолдуң бүгү мага-бодунуң 6 хуу хирези күштүг токтан өрттенген. Ооң кадыының байдалы чүгээр, Бии-Хем кожууннуң төп эмнелгезиниң терапевт салбырында оолду эмнеп турар.
Турлагның ээзи малчынның херечилээни-биле алырга, электри шугумунуң чагыларының аразында сывырындак демирлер хөй чылдар дургузунда черже чоогадыр шөйүлчек турганнар. Ооң дугайында малчын “Тываэнергонуң” чогуур органнарынга каш-даа катап дыңнадырга, электри шугумун септээр талазы-биле хемчеглерни албаан.
Бии-Хем кожуунга элээди оолдарның таварышканы айыыл-халап-биле холбаштыр Тываның Баштыңы Владислав Ховалыг электри четкилерин хынаар, оларның байдалын айыыл чок чоруктуң техниктиг негелделеринге дүүштүр тудар хемчеглерни ап чорударын, буруулуг ажылдакчыларны илередип тыварын, оларга хамаарыштыр чидиг хемчеглерни алырын “Россети Сибирь Тываэнерго” акционерлиг ниитилелдиң удуртулгазындан негээн.
Россияның Истелге комитединиң Тыва Республика талазы-биле эргелели Бии-Хем кожуунга элээди оолдар-биле болган айыыл-халапка хамаарыштыр истелге херээн оттурган.
Ш. МОНГУШ белеткээн.
"Шын" №57, 2023 чылдың август 2