Сентябрь 30, октябрь 1 хүннеринде Кызылда "Херел" спорт залында Армияның төп спортчу клувунуң (ЦСКА) тургустунганындан бээр 100 чыл оюнга тураскааткан элээди спортчулар аразында хостуг хүрешке ажык маргылдаа болуп эрткен.
Аңаа республиканың бүгү кожууннарындан элээди эр, кыс спортчулар, ниитизи-биле 409 мөге киришкен, оларның аразында 60 ажыг уруглар бар. Бо маргылдаа ажык болганы-биле Хакасиядан база спортчулар келген.
"Шак мындыг маргылдаалар чыл дургузунда Россияның бүгү регионнарында болгулап турар. Бистиң элээди спортчулар аразынга мындыг маргылдааны чарлаптарывыска, кожууннардан бүгү тренерлер боттарының белеткеп турар спортчуларының шыырактарын мында киириштирип турар.
Бистиң Кызылда "ЦСКА-Тыва" деп Армияның төп спортчу клувунуң спорт школазы (олимпийжи курлавырлар школазы) Самара хоорайда спортчу клубтуң салбыры кылдыр санадып турар. Бо маргылдааның байырлыг ажыдыышкынынга Самарада АТСК (ЦСКА)-ның начальниги Роман Махонин кээп киришкен. Ол өзүп олурар спортчуларга моон-даа соңгаар чедиишкиннерни, “ЦСКА-Тыва” олимпийжи курлавырлар школазынга хөгжүлдени күзээн. Ол ышкаш Тываның сураглыг спортчулары Александр Доржу, Опан Сат, Артыш Доржу, Аян-оол Ондарны маргылдааның хүндүлүг аалчылары кылдыр чалап, аныяк өзүп олурар спортчу оолдар, кыстарның хей-аъдын көдүрүп, үлегер-чижек болзун дээш чалаан бис. Черле ынчаш, республиканың кайы-даа кожуунунда хостуг хүрешке оолдар, уругларның сонуургалы чылдан чылче улгадып олурары эскертингир. Ол бисти өөртүп турар" — деп, "ЦСКА-Тыва" ОК школазының директору Буян Биче-оол чугаалады.
Маргылдааның түңнелинде кил аайы-биле тиилекчи болган элээди спортчуларга алдын, мөңгүн, хүлер медальдар болгаш кубоктарны Самарада АТСК (ЦСКА)-ның начальниги Роман Махонин тывыскан.
Бистиң корр.
"ЦСКА-Тыва" ОК школазының чуруктары
«Шын» №76 2023 чылдың октябрь 7