Өвүр кожууннуң Саглы сумузунуң чурттакчыларының мурнундан чугула айтырыглыг бижип тур мен. Мээң адым Марта Донгаковна Куулар. Ада-чурттуң Улуг дайынының эгезинде 1941 чылда төрүттүнген күш-ажылдың хоочуну 84 харлыг эне мен. Кадыым багай болгаш, Кызылга эмнелгеге үр үе дургузунда эмнээшкин алгаш келиримге, “Тываэнерго” компаниязының ажылдакчылары март 19-та хыналда чоруткан болду. Түңнелинде хөй акшага торгаап кааннар. Мен черле чырык өртээн счётчиктиң көргүзүглеринге даянгаш, чогуур үезинде төлеп чоруур кижи мен. Назынымда өреленмээн мен, харын-даа баш удур төлээш, бо-ла санап каан түңден эрттир төлепкен болур чордум. Кажан-даа меге чүве кылып чорбаан коммунист мен. Ийи дугаар бөлүктүң инвалиди база мен. “Тываэнерго” Саглының чонунга улуг түңнүг акшаларга торгаал кылып, улусту хилинчектей берген.
Мен электриге хамаарыштыр чүнү-даа билбес мен. Чүгле счётчик-биле төлеп чоруур дээрден башка. Бистиң Саглы сумузунга электрик деп кижи турбаан. Саглы бедик черде турар болгаш хат талазы-биле дыка берге суур болгай. Чырык өже бээрге, электрик чок болгаш, билир кижилерни хөлезилээш, электри удазыннарын коштуруп алыр бис. “Тываэнергонуң” ажылдакчылары хынап келгеш, эде кожуп бээр деп чүүл чок, дорт улуг торгаалга онаап каар-дыр. Ырак суурда, кыдыы черде, чоннуң амыдыралы нарын. Акшаларывыс эм-дом болгаш аар өртектиг хөмүрже чоруй баар-дыр. Моон соңгаар ол-ла дораан торгаай бербейн, дузалажып, шын кожуп бээр аргазын көөрүн идегээр-дир бис. Чон улуу-биле дилеп турар. Бистиң суурувусту кайы чер харыылап турар, чырыывысты эде кожуп бээрин дарый диледивис.
/ Марта КУУЛАР.
Өвүр кожуун, Саглы суур.
Редакциядан:
Марта Кууларовнаның чагаазынга “Тываэнерго” компаниязының специалистери харыыны берген.
“Экии, Марта Донгаковна! Силерниң дилээңерни өөренип көргеш, мындыг харыыны бээр-дир бис. Хыналда үезинде «Россети Сибирь Тываэнерго» компанияның специалистери хемчээр херекселден дашкаар электри энергиязын ажыглап турарының барымдаазын илереткен. Ынчангаш компанияның специалистери хереглекчиге хамаарыштыр актыны тургускан. Хомуданчыг чүүл – ындыг таварылгалар көвей. Бистиң компаниявыс Тываның чурттакчыларынга электри курлавырларын шын ажыглаар суртаал ажылын доктаамал чорудуп турар.
Ол ышкаш демдеглексээн чүүлүвүс — компанияның специалистери Саглыже үргүлчү үнүүшкүннерни кылып турар. Саглыда мастерлер участогу бар, ында ажылчыннар доктаамал турар”.
Чурукту интернеттен хоолгалаан.
“Шын” №22 2025 чылдың июнь 12