Елена Хардикова - Тываның Өөредилге сайыды

Республиканың удуртукчузу Владислав Ховалыг Елена Хардикованы Өөредилге сайыды кылдыр томуйлаан.

«Өөредилге адырын эки билир, күрүнениң дылдарының хөгжүлдези болгаш Өөредилге яамызының ажыл-агыйы дээш сагыжы аарып чоруур арга-дуржулгалыг удуртукчу херек. Өөредилге яамызы – эрге-чагырганың чугула күүсекчи органнарының бирээзи. Ында садик барып турар уруглар, өөреникчилер, сургуулдар болгаш башкылар дээш 110 муң кижи хаара туттунган. Ооң кырындан ада-иелерни немээр болза, Тываның хөй кезии ук яамыга хамааржыр.

Аңаа холбаштыр Елена Викторовна Хардикованың бодунуң төрээн адырынга кичээнгейин салыр дугайында шиитпирин деткидим. Социал политика талазы-биле Чазак Даргазының оралакчы албан-дужаалынга республиканың хөгжүлдезиниң элээн хөй чугула адырлары дээш харыысалганы хүлээнип, ведомстволарның аразында кады ажылдажылгазынче хөй күжүн үндүрүп чорууру дээш өөрүп четтирдим!

Елена Викторовна Өөредилге яамызынга дагзып турарым даалгаларны тергиин эки билир. Ол дээрге, бир дугаарында, билиг шынарын план ёзугаар бедидери. Республиканың Башкыларының улуг чыыжының белеткелин болгаш чорудуун ол эрттиреринге улуг үлүүн киирген. Чыыштың түңнели-биле үндүрген шиитпирлерни Россияда Башкының болгаш дагдыныкчының чылында амыдыралга боттандырары көрдүнген. Е. В. Хардикованың кандидатуразын Россияның Чырыдыышкын яамызы деткиир дээрзинге бүзүрелдиг мен. Удавас ук яамыга Тываның өөредилге сайыды кылдыр томуйладырының дугайында дугуржулга манап турар» - деп, В. Ховалыг социал четкилерде бодунуң арынынга дыңнаткан.