Кадык болуру –бодундан хамааржыр
Республиканың халдавырлыг аарыглар эмнелгезиниң улуг эмчизи, медицина эртемнериниң кандидады, ТР-ниң алдарлыг эмчизи Анна Александровна Сарыглар социал четкиде бодунуң блогунда кижиниң кадыы чүгле бодундан дорт хамааржыр дугайында мынчаар бижээн:
– Бо хүннерде ковидтен аарааш, эмчиде чыдар улустуң саны эвээжеп турар-даа болза, амбулаторлуг эмнээшкинни ап турар улус база бар.
Эскерип көөр чүве болза, бо хамчыктыг аарыгдан аараан улустуң 80 хуузу тарыдып албаан улус болуп турар. Амгы үеде мени дүвүредип турар чүүл – школа барып турар уруглар. Бичии уруглар ковидти чиик эртип шыдаптар деп бодаан ажыы чок. Чүге дээрге бо халдавырлыг аарыгдан аараан соонда, уругларның 30 хуузу ам-даа шагзыргай, кичээнгей чок, шала оожум боданыр хевээр болуп турар. Маңаа дараазында чүүлдү чугаалаксап тур мен – кажан-даа кижи чүгле боду бодунга ынаныр, дузалаар ужурлуг!
Баштай бодалдарны шын угланыышкынче таптыг аайлап алыр – бир дугаарында, чоок улузуңар аарывазын деп бодаар болзуңарза, иммунитетти быжыглаар дээш кызар болза эки. Ол дээрге ыт-кады болгаш өске-даа организм быжыктырар эм шынарлыг оъттар хандызын ижер, күш-шыдал сайзырадыр сула шимчээшкиннер, йоганы кылыр, эртениң-не арыг агаарга агаарлаары-дыр. Ол ышкаш даң бажындан тура чүгле эки бодалдар бодап, эки сеткилдиг болур болзуңарза, шупту чүве эки болур!
Интернетте эмчилерниң ажылынга хамаарышкан чондан хомудалдар бо-ла үнүп кээр-дир. Үш чыл дургузунда үзүктел чок бо хамчыктыг аарыг-биле демисежип, чоннуң кадыы дээш дүн-хүн чок ажылдап турар эмчилерни кээргээр мен.
Мону чүге бижий бердиң дээр болза, бо аарыг үезинде ажылдың хөй болганындан, аар-бергезинден эмчилер шыдашпайн чоруп турлар... А бир эвес кижи бүрүзү бодунуң болгаш чоок улузунуң кадыы дээш сагыш човап, камнаныр чүве болза, аарыг-даа өөскүвес, эмчилерге-даа ажылдаары чиик болур ышкажыл. Камгалал маска кедер режимни сагывас, тарыдып алырындан безин оспаксыраар боорга, канчаарыл ам? Херек кырында аараан улустуң хөй кезии тарытпаан улус болур-дур. А чамдык таварылгаларда аарыг улус аажок шыжыккан, хорадаан кээр, эмнээшкинни үр чорудуп турар дээш, эмчилерни безин чемелей бээр. Аарыгны оода чартыынга чедир эмнеп алыры, бежен хуузунда аарыг улустуң боттарындан хамааржыр, оларның эмчи чурумун шын сагыырындан, кадык болуксаан эки сеткилинден болгаш эмчиже кирип турган үезинде кадыының байдалының хире-шаандан. Ону билзе чогуур.
Кижи бүрүзүнге быжыг кадыкшылды күзедим!
ЭМЧИНИҢ СҮМЕЗИ
23 сентября 2022
65