Чедирилге-аргыжылга адырынга бергедээшкиннер турган дээрден башка, оон өске тургустунуп келген чидиг айтырыгларны компаниялар амдыы дээрезинде бот-тускайлаң шиитпирлеп турарлар деп ол чугаалаан.
Ооң чугаазы-биле алырга, бүгү-делегейниң эм-таң бүдүрүкчүлери Европа комиссиязынче бижикти киирип, нептередип турар санкциялыг кызыгаарлаашкыннарның үезинде эм-таңга болгаш медицина кылыгларынга кызыгаарлаашкын кылбазын, Covid-19-туң бирги чалгыының байдалдарында чедирилгеге өйлеп-таарыштырган “ногаан коридорларны” хандырарын дилээн.
Оон аңгыда, РФ-тиң кадык камгалалының сайыды Михаил Мурашко, үлетпүр болгаш садыг яамызының удуртукчузу Денис Мантуров оларга эм-таң бүдүрер индустрия Россияның девискээринге ажылын соксадыр бодавайн турар дээрзин дыңнадып чедирген деп Шипков медеглээн.
«Хүн бүрү байдал өскерлип-ле турар, турум чүүл чок. Ынчалзажок амдыы дээрезинде эм-таң бүдүрүкчүлери ажылдың янзы-бүрү хевирлерин ажыглап тургаш чагыгларны ээлеринге өй-шаанда чедирип берип турар. Ынчалза-даа бо адырда байдал турум эвес ийин” - деп, Шипков чугаалаан.
Каттыжыышкын эм-таң чедирилгезин доктаамал шинчилеп, херек апарган таварылгаларда тургустунуп келген айтырыгларны россий өйлеп-таарыштырыкчылар-биле чугаа үезинде шиитпирлеп турар дээрзин Шипков немеп чугаалаан.
А. ХЕРТЕК очулдурган.