2024 чылдыӊ эгезинден тура эмнелге албан черлериниӊ 4860 ажылдакчызынга социал төлевирни шилчидип берген дээрзин Россияныӊ Социал фондузунуӊ Тыва Республикада салбыры дыӊнадып турар.
Тускай социал төлевирни кожууннарныӊ төп эмнелгелиринде, эмчи участоктарында, дүрген эмчи дузазыныӊ станцияларында болгаш салбырларында ажылдап турар улуска бээр.
2024 чылдыӊ март 1-ден тура тускай социал төлевирниӊ хемчээли өскерилген. Ажылдап чурттап турар черинде кижи санын барымаалаар. Бир эвес хоорайда 50 муӊдан өрү азы 100 хире муӊ кижи чурттап турар болза, эмчи кижи – 29 муӊ рубль, а ортумак ажылдакчы 13 хире муӊ рубль социал төлевир алыр. Чурттакчыларныӊ саны 50 муӊдан эвээш болза, эмчи кижиге – 50 муӊдан 100 хире муӊ рубль, а эмнелге чериниӊ ортумак ажылдакчызынга 30 хире муӊ рубль боор.
Тускай социал төлевирни алыр дээш, аӊгы билдириишкин биживес, справкалар чыгбас. Россияныӊ Социал фондузунуӊ регионалдыг салбыры төлевирни алыр ужурлуг ажылдакчы бүрүзүнге акша-хөреӊги шилчиде бергеш, Госуслуга порталында оларныӊ хуу кабинединче чогуур дыӊнадыышкынны чорудуп турар.
– Эмнелге албан черлери тускай социал төлевир алыр эргелиг ажылдакчыларныӊ электроннуг даӊзызын ай санында тургузуп турар. Россияныӊ Социал фондузунуӊ Тыва Республикада салбырынга чогуур документини дамчыдып бээрге, даӊзыда кирген медээ ёзугаар акша-хөреӊгини 7 ажыл хүнүнүӊ дургузунда ажылдакчыныӊ агар-санынче шилчидер – деп, Россияныӊ Социал фондузунуӊ Тыва Республикада салбырыныӊ удуртукчузунуӊ оралакчызы Урана Монгуш тайылбырлаан.
Ылавылап билип алыр ужурлуг айтырыглар бар болза, чаӊгыс аай харылзажыр телефону — 8 800 100 0001 (долгаары халас).
Күрүнениӊ хамаатыларны деткип дузалаар хемчеглериниӊ болгаш социал төлевирлер дугайында тодаргай медээлерни Россияныӊ Социал фондузунуӊ сайтызындан (https://sfr.gov.ru/grazhdanam/social_support/) көрүп ап болур.
/ Р. Демчик очулдурган.
“Шын” №97 2024 чылдың декабрь 18