«2022-2025 чылдарда Тыва Республикада туберкулез-биле демисежир немелде хемчеглер дугайында» программа-биле республиканың туберкулезка удур диспансеринге "УАЗ" - 374195-05 чаа автомашинаны саткан. Машинаны амбулаторлуг эмнээшкинде, шимчей албас аарыг кижилерге дуза көргүзеринге ажыглаар деп, Кадык камгалал яамызы тайылбырлаан. Туберкулез-биле демиселдиң диагностика болгаш өске-даа дериг-херекселдери Тываның Баштыңы Владислав Ховалыгның даалгазы езугаар чаартынар. Президент Владимир Путинниң деткимчези-биле республикада туберкулезка удур диспансерниң чаа бажыңы туттунар.
Регионалдыг программа республика девискээринде туберкулезтуң эпидемиологтуг байдалын чавызадырынче база чурттакчы чоннуң туберкулезтан өлүп-хораарын, уруглар ортузунда аарыыр чорукту эвээжедиринче угланган элээн каш хемчеглерлиг. Программа-биле “КамАЗ” автомобильде таарыштырган көжүп чоруур флюоромобильди саткан.
Чаа саткан эмнелге транспорту аарыгны эге чадаларында тодарадырынга дузалаар. Бо хүннерде Туберкулезка удур диспансерниң, Кадыкшыл болгаш эмчи профлилактика төвүнүң, Кызыл кожуун төп эмнелгезиниң база Барыын-Хемчиктиң муниципалдар аразының эмнелге төвүнүң көжүп чоруур флюоромобильдери республиканың чурттакчылыг черлеринче доктаамал үнүп турар.
2023 чылда Тывада туберкулезтан чок болурунуң көргүзүү 2,5 хуу кызырылган. Регионалдыг Кадык камгалал яамызы амгы көргүзүглерни оон-даа экижидер ажылдарны чорудуп турар. Ведомствонуң дыңнатканы болза, бо-ла үеде аарыырының көргүзүү 44,9 хуу өскени аарыгны илередип-тывары идепкейжээниниң бадыткалы.
Республикада туберкулезтан аарып болур кижилерни чылда ийи катап шинчип турар. 15 хар чедир уругларга диаскинтест биле ФГ-шинчилелдерни алды ай болгаш-ла эрттирип турар.
ТР-ниң Чазааның парлалга албаны.
